ORANJESTAD (AAN): Awe Diahuebs for di 5:30 pm te cu 8:30 pm, tin un chens unico pa studiantenan local, bay check ki posibilidad tin pa sigui nan estudio na Universidad di Aruba.
E asina yama ‘Information Night’ aki lo ta consisti di diferente ‘Information Booth’ poni riba campus di Universidad, y tambe lo tin sesionnan informativo cu ta cuminza for di 6:00 pm caba.
Di e forma ey, Universidad di Aruba ta habri su portanan y tur hende ta bon bini pa bay mira kico nan por brinda eynan pa cu Bachelor Studies, y tambe diferente oportunidad cu tin na Aruba.
Estudio Financiero tambe ta wordo duna, y pa yudabo obtene bo grado financiero, e ta algo cu e Facultad na Universidad di Aruba ta semper orguyoso di dje.
Kico mester haci anto? Pesey riba Diahuebs anochi, esnan cu bishita e ‘Information Night’ lo topa cu e studiante Elida Arteaga, kende lo duna informacion clave riba Facultad Economico Financiero, y alavez papia di su experiencia na Universidad di Aruba.
Elida ta studiando na Facultad Economia Finanzas y Marketing aworaki den su di cuatro aña. El a splica DIARIO cu el a caba di yega for di Stuttgart (Alemania), y el a bay haci un minor den Journalistiek y Communicatie.
El a splica cu na Universidad di Aruba, el a siña hopi y a sa di crece hopi personalmente, y esaki ta algo cu e ta cla pa comparti cu tur hoben of adulto cu acudi awe na e Information Night.
Hopi hende kizas ta pensa cu Universidad ta djis algo pa un “un par di estudio”. Pero awor cu e ta 4 aña caba cu nan, su pensamento a cambia completamente. Universidad ta ofrece bo hopi mas oportunidad, cu bo por bay sigui cu estudionan di exterior. Tambe nan ta haya docentenan internacional, y tin studiantenan cu ta bin Aruba pa ‘exchange’. E chens pa crece no ta djis aki, sino tambe pa crea network den exterior.
