Segun Katharine Lacle, head marketing di Post NV
ORANJESTAD (AAN)- Dialuna ultimo Post Aruba a emiti su prome set di stampia pa 2022. Esaki ta un serie titula Orquidea.
Segun Katharine Lacle, head marketing di Post N.V. e edicion aki a wordo diseña pa Natasha de la Fuente cu ta consisti di 4 stampia y 1 envelop pa prome dia di emision.
Pa e resto di aña di 2022 lo bay tin e temanan Flamingo, Marine Life, 130 aña Post Aruba, Love your dog (competencia), y paisahenan di Aruba.
Colecta stampia ta yuda bo siña mas tocante geografia, historia, cultura, arte, flora, fauna, paisnan y hopi mas. E stampia ta manera e porta miniatura pa mundo.
Sra. Lacle a sigui bisa cu pa e aña aki tambe lo bay haci un yamada na tur hende cu ta fotografo y artista pa asina por solicita pa diseña stampia pa 2023.
Segun Natasha de la Fuente, pe tabata un honor pa por a diseña e stampianan di orquidea pa Postkantoor. E inspiracion a bin di su amiganan, famia cu el a bay bishita y saca potret y tambe cu e mes ta un coleccionista.
El a bisa cu esaki tabata un reto cu a tume mas o menos 1 luna y mei, pero cu el a haci su maximo esfuerzo pa wak e den un proyecto bunita y mas colorido posibel. E reto mas grandi tabata pa scoge cua di e stampianan lo pas mihor den e contexto ya cu ta 4 a wordo selecciona.
E diseñonan a keda hopi bunita y sigur ta un bunita emision mas pa e coleccionistanan di stampia.
