Diego de Cuba, Presidente di STA:
- Y tur hende tin derecho riba dos dia liber pa siman
ORANJESTAD (AAN): Señor Diego de Cuba, lider sindical di Sindicato Trahadornan Arubano (STA), den entrevista cu DIARIO a menciona cu un di e cambionan cu nan ta desea, sigur, ta pa gobierno pasa un ley na unda tur sector na Aruba no ta traha mas di 40 ora pa siman, y tur hende tin derecho riba dos dia liber pa siman.
“Mi palabra aworaki pa e clase obrero aki na Aruba, ta cu locual mi ta desea nan ta hopi forza, pasobra e situacion nos dilanti no ta bay ta uno facil, e ta bay ta uno duro, caminda mi ta kere, cada persona mester bay tuma nan medidanan di austeridad, pa sobrebibi e momentonan fastioso cu nos ta bay pasa aden”, De Cuba a señala, y seguidamente a referi na e dependencia di Aruba riba turismo.
“Nos no por lubida tampoco cu nos turismo ta depende na 72%, por lo menos, di e turistanan cu ta bin di Norteamerica, kiermen di Merca. Tey nos ta. Merca ta nister, nos ta haya griep. Anto esaki, nos tin cu compronde, turismo mi ta yame un negoshi hopi lucrativo, cu ta trece hopi placa den bruto, pero bo mester traha bo dam”, Diego de Cuba a remarca.
El a subraya cu Aruba mester traha su dam pa ora e plannan bin tambe, y p’esey ta hopi importante tambe pa esnan cu ta trahando aworaki, principalmente den turismo, cu nos tin hopi hende ta cuida nos producto turistico.
Segun Diego de Cuba, pafo tin un “free for all” anto un monto di problema ta pasando rond di Pais Aruba, y eynan ta unda e ta referi na e hecho cu Aruba a desaroya na un velocidad asina halto.
“Aña pasa Aruba a genera ariba 1.7 miyon. E renovacion cu ta tumando lugar na Aeropuerto 2030, y corda bon cu nos ta bezig ta ricibi mas di 3 miyon bishitante ‘stay over’ cu ta casi dobel di loke nos a ricibi aña pasa. Nos infrastructura, por bay carg’e? Esey ta keda un pregunta hopi grandi, nos ta mira nos careteranan aki na Aruba, un desaster. Tin cierto careteranan, mi ta kere, cu gobierno tin cu bay pone hopi mas atencion riba nan. Ta careteranan hopi transita”, Diego de Cuba a remarca.
