Segun Thomas Ruiz, Secretario di VRA:
ORANJESTAD (AAN): Thomas Ruiz, Secretario di Vereniging Rijscholen Aruba (VRA) y miembro di Comision independiza Bureau Examen Rijbewijs (BER), den entrevista cu DIARIO a trece dilanti algun informacion relaciona cu trafico en general, como tambe examen di rijbewijs.
Segun Ruiz, nan a haya diferente critica y nan a trata di analiza nan y trece un miho solucion cu esaki. Den ultimo siman aki, nan a duna varios informacion relaciona cu seguridad di trafico.
Un di e puntonan primordial ta cu tin varios instructor di trafico no ta regula via leynan vigente manera debe ser, pa asina garantiza clientenan pa haya e miho calidad di les, cu un persona cu tin e conocemento y abilidad pa duna un bon preparacion pa e examen di rijbewijs. Ruiz a enfatiza cu actualmente cualkier persona por gaña hende cu nan por duna les, cu nan tin material completo y corecto. Tin hasta casonan di hende cu a caba di haya nan mesun rijbewijs y su siguiente dia ta ofrece pa duna les.
Ruiz a agrega cu nan no ta usando un central examen bundle manera antes, di Stichting Veilig Verkeer. Bureau Examen Rijbewijs (BER) a djis parti un examen na e rijschoolnan y instructornan cu un cantidad di leynan di trafico y algun material extra. Pero esaki tin su consecuencia, manera ora nan a haci pregunta na directiva di BER relaciona cu e material, specialmente riba e base huridico cu nan a wordo traha. Nan no por a mustra nan na unda esaki ta skirbi, pasobra esaki mester ta trata segun ley.
Tin un idea den comunidad cu djis pasobra un instructor ta un ex-polis e tin e capacidad y conocemento pa duna rijles na tur nivel. Pero e sistema a cambia y e instructor mester tin e material completo y mester tin e conocemento di trafico. No ta tur polis a traha den departamento di trafico.
Ruiz ta alerta esnan cu mester bay pasa examen di rijbewijs pa tene cuenta cu 'scolnan' cu ta ofrece prijs barata, pasobra e por sali hopi mas caro di loke nan a pensa. Su conseho ta pa busca rijschoolnan asocia cu VRA, pone hopi atencion durante les, siña e material completo y no subestima e examen, keriendo cu esaki ta facil. No memoriza e contestanan, pero compronde e materia bon y asina e persona por ta un miho chauffeur riba caminda.
Den su opinion ta un berguenza cu solamente 29 porciento di esnan cu ta pasa examen di rijbewijs ta slaag.
Ruiz ta haya cu tambe mester reforma urgentemente e sistema con ta regula y controla e scolnan di rijbewijs y e instructornan, tanto pa proteha e rijschoolnan mes, como e clientenan.
