ORANJESTAD (AAN) – Diahuebs di e siman aki, Minister di Husticia a reuni ampliamente cu “San Nicolas Business Association” y nan a bin cu un par di recomendacion, segun e dignatario a indica den conferencia di prensa Diabierna.
Minister Bikker a informa cu el a pasa e recomendacionnan aki pa e Hefe di Cuerpo Policial, y nan lo worde sigui.
SNBA a pidi e minister pa pone mas patruya di Polis den area di Pariba di Brug, y lo cumpli cu esaki. Tambe nan a recomenda pa tin mas iluminacion.
Otro medida cu Minister di Husticia a menciona cu e ta tumando ta e siguiente:
“Bo tin organizador di un evento, un actividad, of un doño di un establecimento, y bo tin esnan encarga cu orden publico, cu ta Ministerio Publico y Autoridad Policial. Pero ta keda responsabilidad di e doño di establecimento ora ta surgi problema. Mi ta bay reuni cu nan en general, pero vooral cu esnan problematico. Tin dos establecimento unda cosnan ta sosode hasta casonan fatal, ultimo akinan antayera cu un tiroteo unda un ciudadano inocente, a worde herida. Nos ta bay reuni cu e doñonan di e establecimentonan pa wak kico ta e medidanan cu nan mes ta tumando, pa loke ta trata e seguridad pafo di nan lugar. Y den un extremo, si nos ta haya cu e riesgo pa e establecimentonan aki ta keda hopi halto, nos tin hasta instrumentonan huridico, cu nos por cera e establecimento temporalmente, of pa un tempo indefini”, Minister Bikker a remarca y a reitera cu nan tin responsabilidad pa mantene orden publico, tanto paden como pafo y den cercania di nan negoshi.
E mandatario ta kere cu un di e instrumentonan cu nan por uza por ta camara, pero tambe security guard.
Minister Bikker a agrega cu nan a cuminza cu un Request of interest pero mester a pare door di e pandemia, pa diferente area haya “camara toezicht”, pa asina pone camara moderno den e areanan “hot spot” aki, entre otro unda por ripara cu tin hopi violencia cu arma. “Nos lo sigui cu esaki. Nan ta procesonan cu tabata canando caba, manera mi a bisa, prome cu e pandemia a cuminza y aworaki nos ta bay reactiva nan”, Minister Bikker a señala.
