ORANJESTAD (AAN) — Minister Presidente Evelyn Wever-Croes, den conferencia di prensa Dialuna a referi tambe na e situacion di Covid-19,
bisando cu Aruba tine hopi bon, bao control, na e momentonan aki. Tambe el a duna update riba vacunacion y flexibilisacion di medidanan.
BON DIRECCION, NO FOR DI PELIGER:
“Nos ta bayendo den e bon direccion; nos no ta afo di e peligro ainda, pero nos tine miho controla aworaki. Nos ta mira cu te ayera nos tabata tin 88 caso activo, pues el a baha considerablemente, y esaki ta un cifra cu nos ta sinti hopi confortable cune, weitando si cu cada dia ta bin caso nobo pero mirando tambe cu hendenan ta recuperando”, Premier Wever-Croes a subraya.
E dignatario a señala cu por nota un tendencia si, e ultimo dianan, cu e personanan cu ta wordo admiti na Hospital ta aumentando. Di un banda esey ta un bon señal, pasobra te cu poco tempo pasa tabata mira cu hendenan tabata tarda pa yega Hospital, pa haya asistencia. Ya ora un persona no por a hala rosea mas e ta yega hospital. Y awo ta mira cu mas hende ta bin mas trempan, caminda cu nan por yuda cada un di nan hopi miho”, Minister Presidente a declara.
VACUNACION:
Mas di 57 mil persona cu a vacuna caba cu e prome dosis, y esaki ta pone Aruba na 58%.
“No ta bayendo mes lihe cu tabata bayendo na principio, pero e ta un porcentahe hopi bunita pa mira na e momentonan aki. Mas importante ta cu nos 60 plussers, esnan riba 60 aña, 67% di nan den henter nos poblacion tin alomenos un dosis caba, y esey ta e grupo cu nos kier proteha mas. Pues, nos no a yega unda nos kier yega. Nos kier 85% y pa esey, nos ta trahando riba otro opcionnan pa trece e vacunacion mas cerca di hende, envez cu tur hende mester bay na centro di vacunacion”, e dignatario a señala.
FLEXIBILISACION:
Lo anteriormente bisa, a pone cu gobierno a flexibilisa varios di e medidanan cu tabata tin.
Minister Presidente a splica cu gobierno lo sigui monitorea e situacion cada dia, y cada tres dia re-evalua cual ta e pasonan cu mester wordo tuma.
“Si e cifranan sigui baha y nos por continua na domina e situacion y nos cifra di vacunacion aumenta, e ora ey nos por sigui flexibilisa”, e dignatario a subraya.
El a agrega cu si e cifranan di covid subi y hospital ta bao presion y gobierno no ta logra su meta di vacunacion, e ora ey lamentablemente, mester bolbe bin cu medidanan.
YAMADO NA COMUNIDAD:
“Kiermen, di akinan mi ta haci un yamada na tur hende pa nos sigui cuida; cuida nos mes y nos famia. Gobierno ta hala atras aworaki den medidanan, pa cuida abo y cuida bo famia. Awo ta den bon man pa cuida bo mes y bo famia, pa asina yuda Aruba bay padilanti”, e dignatario a subraya.
