Sindicato ABV ta adverti
- Ministro ta esun cu segun ley por ‘grijp-in’ anytime!
ORANJESTAD AAN): E crisis cu ta afectando Hospital y demas instancianan di cuido na Aruba, ta algo cu Sindicato ABV cu ta representa enfermeria, tabata vigila di algun tempo caba. Tin un grupo chikito di hende kendenan semper ta pensa cu ‘welga’ ta soluciona tur cos.
Aki President di ABV, Gina Maduro, a para keto y a splica cu semper nan pasonan como Sindicato cu ta consisti di profesionalnan cu ta encarga cu cuido y cu hende, ta duna servicio na pashentnan, pues como un Sindicato den cuido, nan no ta pensa di biaha pa bay pone trabao abao. Bo ta escoge pa cana e camindanan, sinta na mesa, pone awa den biña, y purba mira con ta yega na acuerdo cu otro. Esey ta loke nan a haci dos siman pasa caba.
Sindicato ta activamente envolvi, y ta tene reunionnan cu gerencia y tambe e trahadornan, y nan tin di keda observa e dianan venidero loke ta sigui, como cu si acaso no bin solucion riba termino corto, e ora Sindicato ABV tin di prepara tambe Plan B y tambe Plan C.
E hecho cu varios instancia ta pasando den e pre-crisis aki, aunke Hospital ta esun cu a wordo mas fuerte afecta. Sindicato ta sigui sinta na mes pa purba yuda na trece solucion. Nan ta spera cu rapidamente lo por tende bon noticia, pa asina por sigui. Debi cu keda mantene e situacion aki, e no ta sostenibel mas.
Gina Maduro a bisa cu segun analisis haci, si pa November 2026 no bin solucion, e ora lo bay tin problema hasta pa paga salario. Pues pesey ABV no kier pa e yega asina leu, y pa tal motibo ta pone presion pa yega na solucionnan.
Solucion tin! A base di e ley di Landsverordening di AZV, y ta Ministro tin cu instrui AZV pa bin cu e solucion temporal. Aunke AZV a bisa cu nan kier haci investigacion prome, sinembargo e tardanza ey no por perhudica e situacion di crisis aki. Pues no djis keda sinta man cruza warda e investigacionnan di AZV aki keda cla.
Articulo 26 y Articulo 39 di e Landsverordening ey ta indica claramente cu no por permiti un Hospital pasa den situacion asina. Di hopi tempo caba nan mester a actua, y Ministro mester a ‘grijp-in’.
No ta conoci pa ki tempo e 4 investigacionnan di AZV lo keda cla, pero mientras tanto nada di extra placa ta bayendo pa Hospital. Anto e ley di BAZV pakico anto el a wordo bautisa como e forma pa yena AZV su cartera asina gordo... y nada extra ta bay pa Hospital y keto bay e mesun lumpsum cada 2 siman.
