Durante Lanzamento di buki “Ling Legacy, a Journey of Family, Food and One Happy Island”
ORANJESTAD (AAN) -- Tabata diabierna atardi 9 di juli, na Papiamento Restaurant den un ambiente ideal, cu solo bahando, biento fresco suplando despues cu un poco awacero a cay riba Aruba, cu famia Ling, hunto cu un grupo chikito di invitado a reuni pa lansa e buki “Ling Legacy a Journey of Family, Food and One Happy Island”.
Sharlene Starke yiu muher di Yolanda Ling (q.e.p.d), a conta di e origen di e buki y di e fundacion Jordan Ling Foundation na cual tur fondo recauda por medio di benta di e buki lo bay.
“E idea pa skirbi y publica e buki a nace cerca mi tanta, señora Ingrid Ling, casa di mi tio Clifton. E intencion tabata prome pa haci’e un publicacion priva pa famia, pa e keda como un recuerdo pa tur miembro di famia cu ta of tabata parti di e legado di e famia Ling, pues un family book”, asina Sharlene a conta.
Sin embargo na 2015 mientras cu Sra. Ingrid tabata bezig cu e draft, e famia a ser enfrenta cu un dolor
devastador. Su primo Jordan, you di Clifton y Ingrid lamentablemente a tuma su mesun bida a consecuencia di su sufrimento di deficiencia mental. Asina na 2016 a lanta “The Jordan Ling Foundation” pa promove actividadnan relaciona cu Salud Mental. E meta principal ta pa yuda mas tanto posibel, promove cuido di personanan cu ta sufri di Salud Mental aki na Aruba.
