Nos Monumentonan
Santa Cruz 41 B ta conoci como un di casnan mas bieu na Santa Cruz y Aruba.
Na aña 1850 Gezaghebber di e tempo ey a duna Pastoor Schermer un tereno pa traha un Misa y Santana pa Catoliconan na Santa Cruz. Dia 19 di Juli 1852 Pastoor Paulus a bendiciona e prome Misa. Na 1863 Pastoor de Vries a bira e prome pastoor di e parokia di Santa Cruz y Santa Cruz ta bira e di dos Parokia di Aruba.
Na momento cu Pastoor de Vries a bira pastoor di Parokia di Santa Cruz, e pastoor a bay biba den e cas aki cu ya tabata construi. For di mapanan existente por a tuma nota cu na 1825 ya caba tin un cas construi na e sitio.
Na 1921 a finalisa e construccion di e Pastorie nobo y cada bes e cas aki a haya funcion nobo.
Un tempo tabata funciona como cas pa Soeur, un tempo tabata usa e cas pa school, tabata oficina di Ontvanger van Belastingen, tabata usa e cas como Openbare Leeszaal en Boekerij ( Bibliotheek) y tambe como cas.
Compila pa Roberto Croes
Nos Historia Nos Herencia
