ORANJESTAD (AAN)—Den entrevista cu DIARIO, señor Rudy Leysner a bisa cu exactamente, 15 aña pasa, el a lanta e Fundacion Movimento ta Bida.
El a cuminza 19 aña pasa cu Leysner a baha cu pensioen, ainda vital, y e kier a haci algo pa comunidad, y el a bay wak na CBS cual a e grupo meta cu cual e kier a traha. E grupo grandi cu tabata tin tabata esun di 55 aña y el a pensa e ora ey cu “vergrijzing” ta biniendo, y el a dicidi di concentra riba e grupo aki.
“Mi a cuminza cu cinco grupo den bario, y a haci actividad fisico pa e 55 plusnan, pa e grandinan tin algo pa haci y pa nan biba mas largo. Pues, esey tabata e intencion ora nos a cuminza, pero nos ni un a spera un trabao tan grandi”, Leysner a menciona.
Kico Movimento ta Bida a logra a lo largo di e 15 añanan aki?
“Nos a logra mas, pasobra e meta tabata actividad fisico pero nos a forma mas grupo y nos a traha riba e concepto di ‘active aging’ cu no ta actividad fisico so, pero e parti mental, etc., participacion den e comunidad pa nos grandinan tambe tin nan voz. Hopi biaha e grandinan ta bay atras, nan no ta trece nan opinion, pa e voz di e grandinan wordo scucha mas, nos a haci esey”, Rudy Leysner a splica.
El a bisa cu nan ta logrando e meta aki pasobra e voz di e grandinan ta wordo scucha mas tanto cerca nos politiconan tambe, pasobra e fundacion mester fondonan pa sigui traha cu nos grandinan; si nan no wordo scucha, e inactividad di nos grandinan ta bira mas, nan participacion ta bay bira menos, y mester preveni pa nos grandinan keda activo pa resto di nan bida, señor Leydsner a remarca.
El a señala cu hopi pais ta concentra riba e grandinan, na nan manera pa mantene nan activo, y por weita cu Aruba falta ainda pa nos grandinan wordo scucha y pa nan haya fondonan pa traha mas riba nan.
“Un tercera parti di nos poblacion ta di hende grandi, y mi ta kere cu tur esnan cu ta traha cu hende grandi nos no ta yega ni cuater mil pa cinco mil. Kico ta di e otronan cu ta na cas y nos no sa kico nan mester. Nos mester haci un investigacion ta kico tin cu wordo haci, kico nan deseonan ta, y acerca nan, bishita nan, pero e ta un trabao enorme cu nos no por haci”, Rudy Leysner a comenta.
