Lisette Does, director Cas Marie:
ORANJESTAD (AAN) — Den entrevista cu DIARIO, señora Lisette Does, director di Cas Marie, a indica cu manera tur aña tin un evento grandi na Kazerne, riba dia 1 di Mei.
Den entrevista cu DIARIO, el a expresa tin entendi cu Kazerne (Savaneta Kamp) ta duna oportunidad na fundacionnan pa haya donacion pero nan tin cu traha p’e cual ta bende un rifa. E aña aki nan a duna dos instancia donacion: Cas Marie y Centro di Bario Savaneta, y pa esaki nan mes mester bende e ticketnan y esey ta e meta. Cu entre mas carchi nan bende mas placa ta bay destina pa e fundacion cu a bende esaki.
Savaneta Kamp mes ta duna e premio y esaki ta wordo saca dia 1 di Mei mes. Tin premionan hopi bon, hopi grandi incluyendo un ticket pa bay Amsterdam, Hulanda. Ademas, weekend stay, entre otro. E carchi ta 5 florin pa un. Cas Marie ta bezig ta bende e rifa, pero e tempo ta hopi cortico cu e ta acerca interesadonan pa cumpra ticket of pa yuda bende, por yega na Cas Marie te prome cu 1 di Mei.
Net awo cu Cas Marie ta ampliando nan servicio un donacion ta bin hopi bon, y awo nan ta trahando seis dia pa siman (antes tabata cuater) pasobra e demanda ta aumentando.
Nan tin nan retonan, manera e edificio cu mester wordo mantene, nan servicionan sanitario ta worde hopi uza door di e hendenan grandi, y mester wordo mantene mescos cu e plafond, pues e placa ta wordo aprecia sin duda alguno. Señora Does a reitera cu pa Juni Cas Marie lo ta habriendo su di dos dependance.
Nan a haya donacion di un bunita cas pa haci uso di Dje, na Macuarima, y eynan nan lo por bay yuda 18 hende pa dia.
