*Tin denuncia riba su ruman pa amenaza
ORANJESTAD (AAN) — E politico Ricardo Croes, Lider di Partido Red Democratico, a comparti loke ta pasando den su famia cu ta un asunto hopi serio. El a referi na declaracionnan haci pa su ruman homber, ken mester di ayudo pa su salud mental.
Ricardo Croes a expresa e siguiente palabranan: “Nada ta mas grandi cu amor, sin amor bo no ta bay ningun caminda, sin amor no tin pordon, no tin salbacion, no tin speranza, no tin nada!”
Cruz ta haya masha importante pa su persona pa puntra pa un disculpa den nomber di su famia, pa e declaracionnan cu su ruman homber Isidro Croes a haci, tocante cierto comerciantenan di nos pais, e comunidad Hudio na Aruba, famia Croes di parti di su tata. El a bisa cu tur hende cu por a scucha e denuncia publico cu Isidro Croes a haci contra dje, como lider di Partido Red Democratico, riba 24 ora, por a ripara mesora cu ta trata di un persona cu tin necesidad di ayudo medico profesional pa su salud mental y cu a explota. Cu tur cu tin sinti por a realiza cu mi ruman homber tin mester di ayudo. Y mi ta kere cu esaki ta e motibo pa cual el a acudi na 24 ora cu semper tin e intencion pa desacredita su persona desde 2017, cu el a bira parti di e prome gabinete Wever-Croes. El a menciona e dos presentadornan di noticia a declara guera contra dje, y a lastra su nomber y di e ex-minister di enseñanza sin stop.
Sinembargo, RED Democratico mustra di ta integro pues den nan añanan den Parlamento y gobierno, nunca un investigacion a tuma lugar riba nan personanan, den ningun sentido. El a bisa cu su ruman homber a haci diferente declaracion entre otro cu el a entrega su persona un 'machtiging' y cu el a haci maluzo di dje. Ricardo Croes a bisa cu e 'machtiging' aki ta pa representa famia den un caso den Corte. Tambe su ruman a declara cu Ricardo a pone e cas di su mama riba su nomber, pero unico hende cu por pone un cas na nomber di otro hende ta e doño di e cas mes. Croes a splica cu su mama ta un pashent di Alzheimer. El a indica cu su mama ta bibando cu ne, na su cas, y tur dia e ta wak p’e. El a expresa cu no a bin sinta den e rueda di prensa pa papia malo di su ruman homber pero si pa logra haya ayudo pa Isidro, pasobra e mester di dje y tin derecho riba dje.
El a reitera cu te aworaki e ta atende cu su mama responsablemente. El a conta cu su ruman homber locual e ta pensa e ta kere y un dia cu el a bay hiba comestible p’e den menos di 5 minuut e tabata fo'i tino, el a lanta for di vloer cu hopi trabao, cu nanishi y boca kibra, pero el a subi su auto y bay hospital. Ricardo a haci denuncia contra su ruman homber pa agresion fisico, ken a wordo deteni y a keda cera un anochi. 24 ora a uza e caso ey atrobe pa atacha su persona, el a bisa. E ta haya hasta amenaza di su ruman y polis ta na haltura. Asina Ricardo Croes a declara den rueda di prensa. Tin hopi denuncia na polis pero esaki no ta yega OM, solamente un rapport di recherche. Y pa e motibo aki, dia 15 di Mei ora Ricardo tabata sinta den un setting, fiscal no a castiga su ruman sino cu a pon’e den man di reclassering, cu tabata tin e opdrach di yam’e. Diabierna ora el a bay na Reclassering a haya e noticia cu ni un momento so su ruman a wordo yama, ni ta riba lista tampoco. Pues nada di locual fiscal a pidi’e pa e no molestia Ricardo si no, e lo haya castigo no ta bin den esaki.
Ricardo Croes a pidi DIARIO pa publica su banda di medaya pa pueblo di Aruba haya sa ambos banda. Tambe e ta pidi gobierno en general, pa brinda atencion na tur hende cu tin problema di salud mental na Aruba. Esaki ta un situacion serio cu nos pais tin.
