Eleccionnan Midterm a demostra vibracion di Constitucion
*E magia di leynan basico cu a enfrenta e retonan di historia
*Candidato y Partido mester bira fusion pa adelanto colectivo
ORANJESTAD(AAN)—Na e momentonan cu durante fin di siman mundo tabata cera conoci cu e resultadonan di e eleccionnan Midterm na Merca, uno di e miho constitucionnan cu planeta Tera conoce, a entrega e deseo di Pueblo.
Na mitar caminda pa eleccionnan Presidencial, Merca a scoge miembronan di e Cas di Representantenan, un cantidad di Miembro di Senado pero tambe personanan den un cantidad di cargo, cu den e sistema gubernamental Arubano y di mayoria di pais, ta wordo yena dor di Gobierno y no dor di Pueblo.
Personalmente mi ta eternamente gradecido na Gobierno Mericano, cu a invita mi pa tabata presente na tanto ciudad na Merca, ora e eleccion historico di 1976 a tuma lugar y Merca a dicidi cu ta Jimmy Carter lo ta su Presidente.
Di e forma aki mi a cera conoci directamente cu Constitucion Mericano y entre otro e proceso electoral den ciudadnan grandi y aldeanan chikito rond Merca y sinti e vibracion unico di e proceso Constitucional, cu mester defende e interes general tan diversifica di Estados Uni di Merca.
Durante ultimo dianan, Midterm Elections na Merca, a hibami di regreso na e momentonan cu mi por a presencia e ansiedad di e votador Mericano pa no solamente vota pa gobernantenan y personanan den otro cargonan importante pa e pais, pero tambe pa garantisa cu interesnan di un Pueblo procedente di tur parti di mundo cu a forma Estados Unidos, lo wordo sirbi.
Na 1976 Gerald Ford tabata e candidato Presidencial pa Partido Republicano, cu tabata den un problema serio debi na e desaroyonan entorno ex Presidente Richard Nixon cu debi na e scandal di Watergate, mester a baha como Presidente Mericano.
Mi a haya oportunidad di sondea opinionnan di Mericanonan di tur edad, raza, sexo y origen cu mester a bay depone nan voto despues di campañanan sumamente pisa, cu e ambiente electoral cu ta mucho diferente for di e entusiasmo politico Arubano.
Cu un margen chikito Jimmy Carter di Partido Democrat a gana e eleccion Presidencial y e Republicano Gerald Ford a bira perdedor.
Na e eleccionnan regional, por a mira mes tendencia y por a yega na e conclusion, cu e sistema Mericano ta permiti e ciudadano vota pa loke e ta considera su interes personal y interes nacional den cantidad di puestonan.
Importante ta pa mira con ta huzga e candidato mescos cu ta huzga e partido.
Impresionante ta sigur e forma cu e partidonan ta yega na candidato y e sistema di primario, cu ta duna pueblo participacion directo den e personanan cu ta representa e partido di su gusto.
2022 sigur ta un aña dificil pa e representantenan politico na Merca.
Di un banda, e Partido Democrat a ofrece na e candidatonan sosten di entre otro Presidente Mericano, Joe Biden cu ta pasa den un situacion gubernamental sumamente dificil debi na sigur e Guera na Ukraine cu a afecta prijsnan.
Di otro banda, Partido Republicano tabata tin candidatonan cu ta sostenedor total di Donald Trump, cu ta un Presidente diferente. Por a spera cu entre otro e investigacionnan cu ta wordo haci na Merca, lo a afecta Partido Republicano.
E pregunta grandi tabata pues, si balansa lo cay completamente pa Republicano of pa Democrat.
E resultado di Midterm elections 2022 a confirma e resultadonan di 1976, cu condicionnan cu den nos circulo politico lo por a causa landslide pa un partido, no a haci esaki na Merca.
Na 1976 Jimmy Carter y Gerald Ford tabata politiconan cu tabata tin un edad y condicion politico pa sigui dilanti y enfrenta mas eleccion.
Na 2022 tanto Biden como Trump, ta duna indicacion cu nan lo kier sigui dilanti. Pero kico lo pasa realmente na 2024, cu cambionan grandi di generacion y reformacion economico, financiero, social mundial?
E pregunta grandi ta keda tambe si Vice Presidente Kamala Harris, lo ta realmente e candidato pa Presidente despues di Joe Biden.
Hobennan impresionante cu a bini dilanti den Midterm elections 2022, sigur mester wordo tene na cuenta. Cambio di guardia den diferente posicionnan cu ta wordo regla pa medio di eleccion na Merca, ta bira cada dia mas evidente.
2022 ta cera cu Merca, poder mundial di cual Aruba tambe tanto ta depende economicamente, dilanti e segundo parti pa eleccion Presidencial hopi interesante. 2022 ta mira cantidad di candidato pa Senado y otro funcionnan cu ta wordo regla pa eleccion, den un perspectiva nobo crea pa Midterm elections y enfrente un situacion mundial cu ta contene e reto grandi di incertidumbre y mas incertidumbre crea pa petroleo, clima y reforma total di un mundo, cu a perde compas na 2022.
