Misha Raymond di Respaldo:
ORANJESTAD (AAN) – Segun señora Misha Raymond di Respaldo, apesar cu actualmente e organizacion tin un lista di espera largo, ta sigui atende hobennan y evalua cada caso pa identifica e muchanan cu ta mas vulnerabel pa pensamiento di suicidio.
Raymond a enfatisa cu e problematica aki mester wordo aborda di forma integral. Pa logra esaki, ta necesario pa Respaldo, otro fundacionnan, scolnan y instancianan concerni traha hunto pa determina con por ofrece e sosten y atencion necesario na e hobennan.
Durante e conferencia cu a tuma luga siman pasa na Corsou riba e tema aki, a presenta un modelo di school-based intervention. E idea ta pa implementa un modelo similar na Aruba, cu lo prepara docentenan y otro personanan cu ta traha diariamente cu muchanan pa reconoce señalnan di alarma. Nan lo por cumpli un funcion importante den deteccion trempan y actua como intermediario ora nan observa cu un mucha of hoben ta expresa pensamento suicida.
Debido cu no ta posibel pa atende tur caso inmediatamente, Raymond a señala cu ta esencial pa establece un sistema efectivo di monitor, señala y evalua. Esaki lo permiti pa determina cua muchanan y hobennan ta mas vulnerabel y mester ricibi atencion cu mas urgencia.
Actualmente, e ideanan y plannan ta den fase di desaroyo. E meta ta pa conoce e realidad di nos hobennan mihor, fortalece e deteccion trempan y procura cu esnan cu ta vulnerabel pa pensamento suicida por ricibi e guia y sosten cu nan mester na tempo.
Por conclui cu pa atende pensamento di suicidio cerca hobennan, Aruba mester inverti den deteccion trempan, preparacion di docentenan y colaboracion entre scolnan, famianan, fundacionnan y profesionalnan. Un sistema coordina di monitor y señalamento por identifica esnan mas vulnerabel y conecta nan na tempo cu e sosten profesional necesario.
