Parlamentario Eduard Pieters di PPA:
ORANJESTAD (AAN): Segun Eduard Pieters, miembro di Parlamento pa fraccion di PPA, reinauguracion di e Monumento di Piscadornan Perdi ta un gesto cu ta toca alma di nos pueblo. Tin momento den bida publico cu politica ta keda na di dos lugar y humanidad ta tuma su lugar.
Reinauguracion di e Monumento di Piscadornan Perdi na Playa tabata un di esakinan. Parlamentario Eduard Pieters di fraccion di PPA ta aplaudi sinceramente e gesto di Gobierno di Aruba pa invita Parlamento tambe na e ceremonia, ya cu ta trata di un acto di respet profundo pa e famianan cu a paga e prijs di mas halto: e perdida di un ser keri.
Un iniciativa cu tin historia y significado profundo! “Na 2013 a realisa e monumento aki pa medio di fondonan di TPEF y ATA, durante liderazgo di ex-minister Otmar Oduber. Su proposito tabata cla y noble: honra e piscadornan cu marduga ta sali bay lama pa gana nan pan di cada dia, pero cu tristemente nunca a bolbe cas. E iniciativa ey tabatay ta sigui ta un simbolo di memoria, dignidad y reconocemento pa e hombernan cu a entrega nan bida na lama” Eduard a expresa.
Fraccion di PPA ta expresa aprecio tambe pa minister Wendrick Cicilia, cu durante e reinauguracion a duna reconocemento formal na sr. Otmar Oduber mediante un plakaat, reconfirmando cu Aruba no ta lubida esnan cu a planta e simia di respet y memoria.
Un anochi yena di emocion: E reinauguracion tabata un anochi cu sentimento mixto. E famianan presente, algun cu speranza ainda bibo, otro cu silencio profundo, tabata representa un dolor colectivo cu no tin fecha di expiracion. Eduard a indica cu den combersacion cu algun invitado, a keda hopi cla cu pa hopi famia, e marduga ainda ta e ora di mas duro: ora nan ta tende silencio en bes di noticia, ora e speranza ta keda suspendi entre lama y shelo.
Segun Eduard: “Hopi a comparti nan dolor, e falta cu no por wordo yena y e ritual silencioso di bolbe na e monumento pa busca refugio, consuelo y un momento di paz. E monumento ta bira no solamente un punto fisico, pero un espacio espiritual pa duelo, memoria y forza”.
Finalmente parlamentario Eduard Pieters ta subraya cu e monumento aki no ta solamente di piedra y brons, pero di historia, respet, speranza y humanidad.
