Den preparacion di profesionalnan pa futuro e ta central --- *Etiketa na entrada di e mundo di mañan di e studiante --- *Clubnan estudiantil y e introduccion na e lugar di futuro
ORANJESTAD(AAN)—Cada situacion mundial nobo ta afecta e futuro y e caminda pa e futuro di e futuro profesional cu awe ta hoben.
Den temporada di vacacion, muchanan chikito ta prepara pa nan drenta e sistema escolar y esnan cu ya ta parti di e sistema, ta sigui avansa.
E grupo cu a termina su estudio ta bira parti di e proceso laboral na tur nivel.
Pa un cantidad di famia tempo di vacacion grandi ta nifica tambe cu ta despedi di yiunan cu ta bay studia den exterior, mayoria biaha na Hulanda, otronan na Merca of den region.
Manera DIARIO ya a relata den edicion anterior, bida di un studiante no ta nada facil. Nos a uza Hulanda pa trece detayenan dilanti cu ta presenta den bida di studiantenan ya cu e situacionnan aki ta mas comun pa e grupo cu ta bay Hulanda.
Pa tur studiante cu ta scoge pa un profesion cu ta exigi preparacion academico, universitario, sigur mester tene cuenta cu e realidad, cu nan a scoge directamente pa ta dirigente di futuro.
Nan ta subi e caminda pa un mundo den cual reglanan pisa ta conta. Ser dirigente ta exigi un base sumamente importante, cu sigur clubnan di studiante ta yuda crea.
Ser miembro di un club of organisacion di studiante ta costa placa na Hulanda y Merca.
Pa keda un rato na Hulanda, caminda mayoria di studiante lo sigui nan estudio, mester conclui cu na academia ta haya educacion academico.
E clubnan di studiante tin dos aspecto sumamente importante ya cu nan ta asisti e studiante den preparacion di e bida social cu nan lo hiba como profesional.
E clubnan di studiante tambe ta entrega na e hoben studiante, un circulo di amistad cu despues ta bira su relacionnan den su bida profesional hasta ora e profesional Arubano bolbe cas.
Aki tin un punto masha importante pa trece dilanti.
Tin hoben cu ta bay Hulanda y ta busca e circulonan di amistad cu ya nan tabata conoce na Aruba y ta cera nan mes den e grupo aki.
Hopi bez e grupo aki ta haya su mes den problema social of ta limita su posibilidad pa crea futuro relacionnan profesional den exterior, loke ta sumamente importante pasobra un profesional bida largo mester sigui amplia su conocemento y mester por tin relacionnan cu ta sostene.
Importante ta sigur e hecho cu e clubnan estudiantil ta prepara nan miembronan tambe pa e parti social di nan bida como profesional, di dirigente of persona specialisa riba nan tereno.
E persona aki mester ta capaz pa atende cu hende segun reglanan internacional, con ta atende cu un persona; con ta papia cu un persona; enfin kico ta reglanan internacional di etiketa mundialmente.
Protocol no ta pa politiconan so. Subi trapi tin su regla pa homber y muhe. Cual bebida ta wordo sirbi y ta bebe na cual momento, ta parti di regla.
Con ta hinca un menu den otro, ta regla mescos cu loke ta bisti pa cada occasion.
Den e mundo profesional pa cual e studiante ta scoge e comportacion basa riba etiketa, ta sumamente importante.
Hasta pa personanan cu ambicion politico ta importante pa conoce e reglanan aki. Un politico mester ta na haltura ki ora e ta duna man prome cu e otro persona y kende e por brasa of sunchi na cual momento.
E reglanan aki ta conta pa profesional, pa dirigentenan sigur den tur sector y personanan cu ta representa entre otro cara di un compania of organisacion.
Studiantenan ta cuminsa un bida cu ta prepara nan pa un futuro den cual nan lo ocupa un funcion cu ta demanda respet. Nan mester duna respet na nan manera pa nan ricibi e respet aki.
Comportacion ta keda yabi pa futuro. Comportacion ta hancra den Arubianismo cu ta bati na porta prome cu habri porta pa drenta.
Comportacion ta determinante pa un studiante cu kier sigui cana den bida y asumi posicionnan eleva den un comunidad, den cual e mester inspira respet cu ta bay mas leu cu e palabra cu “ta ami ta dicidi”.
