Controversia di Landspakket
ORANJESTAD (AAN): Parlamentario Setty Christiaans-Yarzagaray di Partido MEP, a caba di regresa for di e reunionnan di IPKO na St. Maarten. El a haya e plataforma di IPKO uno sumamente importante awor cu Hulanda ta na vispera di bay dicidi y aproba leynan cu ta encera COHO, y cu lo afecta henter Caribe Hulandes.
Na opinion di Christiaans-Yarzagaray, loke el a haya importante y cu el a trece dilanti durante IPKO, ta e asunto di Landspakket. El a haci esey, pasobra na final di dia ora ley di COHO wordo aproba, e ta regarda un secuencia di puntonan den Landspakket y na final di dia e uitvoeringsagenda cu Gobierno a stipula hunto cu Den Haag den un trayecto pa haci un reforma, e organizacion rond di dje, pero tambe e desaroyo.
Parlamentarionan di Aruba, aunke nan no a wordo involucra den e parti di e proceso ey, nan ta haye si pa lesa con e progreso di e puntonan ta den e uitvoeringsagenda, y tambe kico falta y con ta yegando na e puntonan aki, cu ta rekesitonan cu Aruba a ricibi pa por obtene financiamento di e sosten di liquidez. E ta regarda diferente punto, y no djis riba asunto di enseñanza y cuido di salud, pero tambe e parti financiero y reforma den su totalidad, e parti di impuesto, diferente aspecto, y e ultimo uitvoeringsagenda di Maart, e pais Aruba (contrario na December) tabatin cuatro punto geel di cual mayoria ta riba linea! Aki a usa un codigo estilo luz di trafico (berde, geel, cora), pues si bo ta bayendo bon bo ta haya punto berde, si ta mas o menos ta punto geel, y pa e aspecto di Aruba, nunca tabatin un punto cora.
Diferencia si ta cu por ehemplo na December tabatin un parti geel so, cu ta un doorlichting cu mester a ser haci door di Departamento di Salud Publico, y esey a keda cla. Awor tin cuatro diferente punto, pero den e splicacion di e uitvoeringsrapport ta mustra cu diferente di e puntonan aki no tin di haber pasobra ‘Aruba no ta cumpliendo’, pero mas bien debi na e instituto cu Hulanda a asigna pa haci cierto investigacion, a laga sa cu nan no tin ‘afinidad’ cu Aruba.
Anto esaki ta hustamente puntonan cu e Parlamentarionan tambe a tuma como punto di discusion cu Parlamentarionan Hulandes. Pasobra hopi biaha ta facil pa pensa cu hopi biaha “Aruba” of e otro islanan no ta cumpli, pero esaki no necesariamente no ta cumpli pasobra e pais no ta cumpli, sino por ta pasobra e parti di organo COHO ta bay busca hendenan cu ta supervisa e adelanto di e logronan aki, y tin diferente punto cu Parlamentarionan no ta di acuerdo, y esaki hustamente ta uno di nan.
Con nos ta tuma hendenan cu no sa ni conoce nos pa bay haci un doorlichting di algo cu nan no ni sa di dje. Esaki ta djis un di e puntonan cu tambe a trata den IPKO.
Setty su aspecto di e Landspakket tambe ta e controversia di e ley aki. Pasobra na un banda tin RAFT cu ta duna sistema di normering, pues baha gasto, baha gasto di personal, y bira mas eficiente den Gobierno. Pero otro banda tin COHO cu ta haci doorlichting y ta bisa kico ta necesidadnan di Gobierno y den kico tin di bay haci reforma, y cua proyecto tin di bay ehecuta pa yega na esaki.
Anto pareu cu tin e parti di COHO, nan ta bisa cu Aruba falta hende, tin di bay pone mas placa riba presupuesto, pasobra pa haci e doorlichting y cumpli cu e proceso di uitvoering aki. Nan ta indica den diferente informe cu Aruba falta hende cu capacidad, pasobra e isla aki cu su escala chikito tin Departamento asina conciso di cantidad di hende, y awor e mesun hendenan aki tin di bay haci e trabao pa COHO.
Hulanda tin ambtenaar no djis pa e pais, sino tambe esnan cu ta traha pa Gemeente y nan por yuda otro. Aruba y e otro islanan den Caribe no tin e luho ey.
Pues e controversia di busca mas hende cu capacidad, cu mas fondo pa ehecuta e Landspakket ta controversia di otro ley cu kier baha gasto y baha personal.
