ORANJESTAD (AAN): Dialuna mainta a keda anuncia cu e proyecto PRISMA, cu ta dirigi na esnan cu tin diabetes tipo 2, ta bay sigui e biaha aki cu sosten financiero di Pan-American Health Organization (PAHO).
Charlene Leslie, Coordinador di e proyecto a indica cu e ta masha contento cu e proyecto PRISMA ta bek. Na 2019, Fundacion Diabetes Aruba a cuminsa cu e cursonan di PRISMA como un programa piloto.
Na maart 2020, mester a haci un pauze door di Covid-19, pero aworaki PRISMA ta bek. PRISMA ta un programa diseña pa stimula e maneho propio di esnan cu tin diabetes tipo 2, Leslie a indica.
E programa ta un programa di Hulanda, di Amsterdam UMC (University Medical Centers) y den colaboracion cu nan a adapta e programa aki pa e cultura di Aruba. E programa di Hulanda PRISMA ta a base di un programa di Inglatera, pero ta wordo duna na Australia y na New Zealand tambe cu tama 'Desmond'.
Na e paisnan aki, esaki ta un programa 'evidence based'. El a wordo adapta pa Hulanda, y aworaki adapta pa Aruba caba, a bisa.
E aña aki PRISMA Aruba ta conta cu e sosten tambe di Departamento di Salud (DVG) y Pan-American Health Organization (PAHO) y esey ta duna e team di Aruba hopi entusiasmo y motivacion pa sigui, door cu e dos organisacionnan aki pa Fundacion Diabetes Aruba ta e confirmacion cu esaki ta un programa di nivel cu cual por yuda comunidad cu ne, Charlene Leslie a expresa.
CURSONAN
PRISMA ta un curso duna den gruponan chikito di maximo 7 persona teniendo na consideracion e protocolnan di Covid-19 vigente. E ta pa duna e persona mas conocimento riba e malesa, pero tambe riba e factornan di riesgo y con nan por influencia den un manera positivo. Tambe ta ofrece e hermentnan practico pa por haci algo cu e conocimento aki, a agrega.
E trainernan cu ta duna e curso ta profesionalnan den tereno di salud trahando den e ramo di diabetes y cu a sigui un training special.
PRISMA ta un curso di 3 dia y cada dia ta 3 ora. E tres dianan aki ta parti den 3 siman consecutivo. Prome tabata tin'e na dos dia, pero aworaki a haya e 'feedback' cu e participantenan tabata tin necesidad pa mas. Pesey a amplia pa 3 dia, den 3 ora den 3 siman, Leslie a indica.
E curso ta inclui un plan di accion personal cu e participantenan ta bay traha pa nan mes pa asina nan por planea con nan ta bay maneha nan salud mas miho, cuminsando for di e dia di e curso y pa futuro.
Despues di completa tur tres dia e participantenan lo ricibi un certificado di participacion. E curso aki ta specificamente pa esnan cu tin diabetes tipo 2 y danki na e sosten di PAHO, e biaha aki ta gratis.
Den e lunanan di Mei, Juni y Juli e curso lo ta completamente gratis y na Juli lo evalua si por sigui cu ne di e forma aki, Charlene Leslie a remarca.
Ta bay tin diferente fecha, diferente localidad y orario.
REGISTRACION
Esnan cu kier participa por registra na www.fdaruba.com. Pa mas informacion por manda un email na Cette adresse e-mail est protégée contre les robots spammeurs. Vous devez activer le JavaScript pour la visualiser. of via Facebook: Fundacion Diabetes Aruba.
