Containernan di e planta ‘mobile’ for di Apeldoorn Hulanda ta rumbo pa Aruba
ORANJESTAD (AAN): WEB Aruba NV a indica cu despues cu WEB Aruba y e compania hulandes Bredenoord na mei ultimo a firma pa un planta temporal di 20 MegaWatt di energia e proyecto ta den pleno ehecucion.
Entretanto a mobilisa e containernan di e planta ‘mobile’ for di Apeldoorn Hulanda y nan ta rumbo pa Aruba.
Ta preparando e tereno y e infrastructura pa por instala nan pabou di planta RECIP Phase IV. E proyecto ta encera un planta ‘mobile’ cual lo sirbi pa por cumpli cu aumento creciente di demanda pa coriente, pero tambe como back up na momento cu motornan RECIP mester haya nan mantencion obligatorio, of ora e suministro di energia di biento of solo cay di ripiente.
E planta ta encera un total di 24 container di 20 ft cu ta contene generadornan di 850 KW. E planta 'mobile' lo ta den operacion na Aruba pa un periodo di 2 aña.
