ORANJESTAD (AAN): Prome Minister Evelyn Wever Croes y Minister Plenipotenciario Ady Thijsen a reuni cu Presidente saliente,
señor Nico van Grieken y Presidente actual señor Marlon Titre di e organizacion na Hulanda Genootschap Nederland-Aruba. E organizacion aki tin como meta pa estrecha lasonan entre Aruba y Hulanda.
Despues di a hiba conbersacionnan hopi informativo cu e representantenan di e organizacion, e mandatarionan a gradici e organizacion pa e trabaonan cu nan ta haci diaramente y tambe nan a gradici primordialmente señor Nico van Grieken pa trabaonan desplega pa e organizacion y pa Aruba en general. Alavez tambe a desea señor Marlon Titre tur cos bon y exito den su posicion como presidente di e organizacion.
Genootschap Nederland-Aruba ta haci hopi trabaonan informativo pa Arubianonan na Hulanda entre otro ta organiza charlanan. Na un encuentro na 2018, Prome Minister a worde invita pa duna un charla y ainda hopi hende ta referi na e encuentro aki como uno hopi informativo y efectivo.
“E importancia di organizacionnan asina na Hulanda ta grandi pasobra nan por logra estrecha lasonan y crea brugnan entre organizacionnan na Aruba y organizacionnan na Hulanda na un forma mas efectivo. Nos ta gradici Genootschap Nederland-Aruba pa tur trabao cu nan ta haci y nos ta mira riba cooperacionnan mutuo den e periodo nos dilanti”, Prome Minister a remarca.
