ORANJESTAD (AAN): E entusiasmo entre e comerciantenan di Caya Grandi ta keda halto despues di anuncio di e proximo edicion di Ban Bek Caya.
E ultimo evento a mustra atrobe cu e iniciativa a duna resultado positivo, cu varios comerciante cu a participa cu ofertanan y promocionnan atractivo, resultando den bon benta y hopi movecion den centro di ciudad.
Ban Bek Caya ta un iniciativa di Gabinete AVP–Futuro cu e meta pa trece bida bek den Caya Grandi y duna un impulso economico na e comerciantenan estableci den e zona. Cada edicion ta bira mas grandi, y e efecto positivo ta bira mas visibel pa tur partner envolvi.
Edicion aki lo ta un manifestacion cultural cu realse riba e Bon Comun colectivo. Ademas cu lo haci un invitacion na tur nos bishitantenan, lo inclui tambe oradornan presente riba nos ilsa pa e Expo y Conferencia Common Good pa forma parti di e evento aki den centro di nos ciudad.
Durante e ultimo edicion, hopi persona a probecha di e orario y e ambiente festivo pa haci nan compras y disfruta di e bon ofertanan cu mayoria di comerciante a presenta. Diferente tienda a prepara nan mes pa brinda un miho experencia na cliente, adaptando nan local y creando espacio parti pafo pa sinta, come y disfruta di ambiente y famia den centro di ciudad. E ta Diabierna 30 di januari, di 6:00 pm te 10:00 pm.
