ORANJESTAD (AAN): Dia 22 di mei tabata Dia di Praktijkondersteuner Huisartsenzorg (POH),
un profesion cu desde su introduccion na Aruba na aña 2012 a bira un pilar importante den cuido preventivo riba nos isla. Cu compromiso, amor pa profesion y dedicacion, POH’nan ta sigui contribui diariamente na bienestar di comunidad Arubiano.
E ocasion especial aki no a pasa desapercibi. POH Aruba a organiza un celebracion special como muestra di apreciacion pa e trabao valioso cu nan profesionalnan ta brinda dia tras dia na nos comunidad. Señora Anette Kelly-Wester a comparti algun detaye tocante e actividadnan cu a tuma lugar durante e celebracion.
Durante e dia, participante nan a disfruta di un lectura inspirador y sumamente interesante tocante comunicacion efectivo, presenta pa profesionalnan local. Despues, coleganan a reuni pa un lunch agradable, sigui pa un actividad interactivo y recreativo banda di piscina, creando un ambiente di conexion, alegria y compañerismo. E celebracion a cera cu un momento pa relaha y agradabel den un ambiente trankil y positivo.
Segun señora Kelly-Wester, durante henter aña POH’nan ta traha hunto cu dokternan di cas pa brinda apoyo y guia na pashentnan cu diabetes, presion halto, stress, depresion, tristesa y otro condicionnan cu ta afecta salud y bienestar. Dia di POH ta un momento pa reconoce e trabao importante cu nan ta haci, pero tambe pa nan mes por disfruta, recarga energia y aprecia otro.
Finalmente, señora Kelly-Wester a felicita tur su coleganan riba e ocasion especial aki y a desea nan hopi forsa, pasenshi y amor pa continua eherce nan profesion di curason y dedicacion.
{gallery}Profesionalnan di POH Aruba a celebra nan dia cu orguyo, union y alegria{/gallery}
