BARRANQUILLA: E siman aki, habitantenan di varios bario di Barranquilla y tambe Soledad na e parti nort di Colombia,
a bin ta kehando di e mal estado di awa cu ta saliendo for di cranchi.
Debi cu e calidad di awa cu ta yegando na e casnan no ta “den condicion optimal”, hopi habitante a dicidi na cumpra awa purifica sea den boter of den saco di plastico. Esaki a genera un aumento di benta di awa den tienda y otro negoshinan na e ciudad.
Esaki ta pone cu algun di e boternan aki ta caba y no tin stock mas di nan.
Bo no ta hayando e boternan grandi di 5 liter tampoco, djis e boternan di 1 liter. Y esakinan ta sold-out tambe na varios tienda.
Comerciantenan a ripara mesora con tur hende ta cuminza cumpra awa, y nan ta reconoce cu demanda pa awa den boter a bay sky-high. Hopi hende ta buscando esnan di 5 liter pa cumpra, specialmente pa nan por cushina cune. Nan ta evita di usa e awa di cranchi pa prepara cuminda. Tin hende cu ni kier usa e awa pa laba tayo y utensiyo.
Barionan zuidwest di Barranquilla tambe ta kehando di e mal calidad di awa. Tin hende cu a cumpra awa pa bay wanta nan un siman, pero apenas 1 dia despues ya e boternan di awa a keda bashi.
Aunke situacion financiero ta dificil, e habitantenan ta prefera di haci e inversion di cumpra awa den boter, envez di usa e awa cu actualmente ta sali di cranchi. Pa evita cu nan ta bira malo di dje.
Algun hende a bira malo: Na municipio Galapa cu ta keda como 8 km zuidwest di Barranquilla, a cuminza drenta informacion di hendenan cu a wordo afecta pa e mal condicion di e awa potable.
E awa cu ta sali di cranchi tin un color straño, y tin un sabor desagradable cune.
E compania di awa a adverti di antemano cu nan ta bay haci trabao na un Dijk cu a wordo construi den zona di colecta awa di rooi, cerca di e zona di procesa awa potable. Nan ta trahando riba dje, y ta kere cu pa fin di siman aki e color raro lo desaparece. Ta bay habri varios hidrante den ciudad pa asina spula e awa malo cu tin den e sistema.
