Tocante loke falta pa desaroya San Nicolas:
ORANJESTAD (AAN) Den entrevista cu DIARIO, señor Errol de Freitas., presidente di San Nicolas Business Association (SNBA), a expresa cu enberdad nan ta un asociacion di comerciante, pero nan si ta saliendo y pushando ‘pa e bon sali’. Asina el a expresa.
“Mi tin cu bisa, nos tin un gobierno sinta bayendo pa diesun luna, pero unda nan ta? Den sentido cu nos tin un par di reunion, pero nos tin cu deal cu e situacion aki. Y mi ta spera cu despues cu carnaval pasa, nos por tin e reunion cu Conseho di Ministro”, Errol de Freitas a señala.
De Freitas a expresa cu tur hende ta yega na San Nicolas ora di eleccion. San Nicolas ta e area di Aruba cu falta desaroyo. Playa tin 15 mil camber, tur e barconan ta yega aki, aeropuerto t’eynan, tur e economia t’eynan.
“Anto di con nos no por sinta traha riba locual nos ta poniendo pa nan. Nos no mester di reconocimento di dje, pero sikiera duna nos bin paden, bay papia di e coi aki, y na final di dia nos ta bay atras, atras”, señor de Freitas a menciona.
El remarca cu e prome prioridad actualmente, mester ta San Nicolas, sin kita sin pone. Esaki kiermen e aspecto social, vivienda, infrastructura. “Nos mester di esey, nos no ta bringa, nos no ta insulta, nos pidiendo atencion; duna nos e atencion ey. Mi tin casi ocho aña den e asunto aki, anto mester yega e punto cu algo mester pasa. Anto nos ta pidiendo gobierno, encarecidamente, ban papia, ban drecha e asunto aki”, de Freitas a remarca. El a agrega cu na final di dia, ora cu el a ripara cu mayoria den e Comision aki ta di oposicion, anto mester di e coalicion hunto cu oposicion pa nan por tuma un decision.
