ORANJESTAD (AAN): Mientras Fraccion di MEP a indica cu Presidente di Parlamento Marlon Sneek no ta yama reunionnan cu nan pidi,
y ta laga mustra como sifuera esaki ta 90 reunion, Presidente di Parlamento a indica cu ainda falta exactamente seis reunion cu mester wordo yama ya duna un resumen di e reunionnan aki.
Entre nan tin e reunion cu Minister Gerlien tocante LAR. El a indica cu bou di peticion di e minister cu a informa cu e ta na LAR y ta dentro di e tempo cu LAR a dun’e pa contesta, e ta pidi tempo y pa warda un rato cu e reunion publico.
Tambe un otro reunion publico cu a wordo pidi ta tocante e maneho di Arubahuis y Europa den su totalidad. Pa e reunion aki Minister Plenipotenciario na Hulanda mester ta presente. Actualmente e minister no ta na Aruba pero e reunion a wordo yama despues cu e minister a caba di bay bek Hulanda, mientras e tawata na Aruba y Fraccion di MEP no a probecha pa pidi e reunion. Awor ta warda ora cu e minister ta bek na Aruba pa yama e reunion aki.
Un otro reunion cu Fraccion di MEP a pidi ta tocante e motibonan pa cua Prome Minister Mike Eman a tuma su retiro. Mientras cu den un otro reunion publico Parlamentario Evelyn Wever-Croes a haci e pregunta aki na unda cu Prome Minister a duna un contesta elabora.
Tambe tin pendiente e reunion tocante ‘kinderopvang’. Presidente di Parlamento a indica cu ta coordinando esaki cu Minister Gerlien Croes. Pa motibo cu e minister y miembronan di Parlamento tawata ausente pa algun dia pa trabou den exterior, y bishitanan oficial entre otro na Corsou, e reunion no a tuma luga ainda.
Un otro reunion pendiente ta riba peticion di Minister Geoffrey Wever riba e topico di LNT, esta e salario di e top ambtenaarnan. E minister mes a pidi un encuentro cu Parlamento pero Fraccion di MEP a indica cu nan no kier un Openbare Bijeenkomst (OB) sino un Openbare Vergadering (OV). E reunion aki a keda pending pasobra e minister mes a pidi pa e splica con leu e ta cu e cambionan.
Tambe tin un otro reunion pending cu Minister Gerlien Croes over di gunning. E prome tanda a tuma luga caba, preguntanan a wordo haci y contesta. Falta e segunda tanda pa conclui e reunion.
Por conclui cu no ta trata di falta di boluntad pa yama e reunionnan, sino di coordinacion, disponibilidad di minister y e necesidad pa algun topico wordo clarifica of actualisa prome cu debate por continua.
