Aruba ta relativamente seco, pero cu hopi biento y stof di Sahara...
*Ta pronostica cu entre 6 y 10 tormenta por bira horcan
ORANJESTAD (AAN): Aunke Aruba ta pasa un periodo relativamente seco pasobra por a sinti djis un ke otro yobida pasahero den cierto partinan di e isla, cu tiki solo, basta nubi, hopi biento y presencia di stof di Sahara recientemente, e temporada di horcan 2025 a cuminsa oficialmente dia 1 di juni.
Segun pronosticonan meteorologico, e temporada aki por ta mas activo cu normal, locual ta pone enfasis riba e necesidad pa preparacion, a pesar cu Aruba no ta generalmente den e trayectoria directo di horcannan tropical.
NOAA (Administracion Nacional Oceanico y Atmosferico) y Universidad Estatal di Colorado ta pronostica entre 13 y 19 tormenta cu lo haya nomber durante e temporada, cu por dura te dia 30 di november. Di esnan, entre 6 y 10 por bira horcan, y entre 3 y 5 lo yega categoria 3 of mas, cu bientonan fuerte di 178.64 km/h of mas.
E horcannan ta haya nomber ora nan bientonan yega 62.76 km/h. E lista pa 2025, asigna pa Organisacion Meteorologico Mundial, ta inclui: Andrea, Barry, Chantal, Dexter, Erin, Fernand, Gabrielle, Humberto, Imelda, Jerry, Karen, Lorenzo, Melissa, Nestor, Olga, Pablo, Rebekah, Sebastien, Tanya, Van y Wendy.
E nombernan ta ripiti cada seis aña, pero horcannan cu causa daño significativo ta resulta den e retiro di su nomber di e lista.
Segun e mesun fuente, tin un 60% probabilidad cu e temporada lo ta ‘riba normal’. E tipo di actividad cu por surgi ta comparabel cu e temporada di 2020 y 2021, cu a registra nivel record di horcannan.
Aunke Aruba ta generalmente fuera di e ruta principal di ciclonnan tropical, efecto secundario manera bientonan fuerte, ola grandi, y awacero repentino por tuma lugar. Esaki ta reforsa e importancia pa cada residente tin un plan di emergencia, evalua seguro di cas, y tene un kit prepara cu awa, comestibel no perecedero, medicamentonan basico y otro articulonan di prome necesidad.
Expertonan ta alerta tambe riba e papel cu cambio climatico ta hunga den e intensidad creciente di horcannan. E fenomenonan meteorologico ta bira mas potente y imprevisibel, locual ta subraya mas e importancia di infrastructura resistente y concientisacion publico.
E mensahe ta cla: a pesar cu tempo por parce trankil, e riesgo ta real. Preparacion ta bo miho defensa.
