ORANJESTAD (AAN): Prome Minister Evelyn Wever-Croes a hiba palabra durante e conferencia di prensa extraordinario diaranson atardi unda e ta referi na e carta cu CAft
a dirigi na Conseho di Minister di Reino unda nan ta duna conseho pa Aruba haya un 'aanwijzing' (instruccion).
E mandatario a splica kico ta e impasse cu Gobierno di Aruba ta aden cu CAft. El a bisa cu e mes a reuni cu e presidente di CAft varios biaha y un di e puntonan cu semper ta bin dilanti ta e tema di gastonan di personal.
El a agrega cu segun CAft e gastonan no ta bahando tur aña y segun cifranan di gobierno ta bahando tur aña. A pidi CAft nan cifranan pa por compara nan y mira for di unda nan ta sacando nan conclusionnan.
Gobierno tin e cifranan cu a wordo aproba pa Parlamento y e cifranan aki ta mustra un reduccion den e gastonan aki for di aña 2018, cu ta e protocol cu a cera e tempo ey, a indica.
Wever-Croes a sigui bisa cu otro punto cu tin nan dividi ta e tema di impuesto y entradanan di impuesto. CAft a indica cu nan no a haya splicacion di Departamento di Impuesto dicon tin cierto impuestonan ta kedando atras.
Prome Minister a bisa cu ora cu el a busca informacion na DIMP, e directora a mustr'e cuanto informacion el a manda CAft pa splica e pregunta cu CAft tabata tin.
Tin un 'gap', a remarca, den e comunicacion cu tin cu bay traha riba dje.
Tambe CAft kier pa gobierno adapta a cifra economico y bay sinta riba un cifra mas halto y a splica CAft varios biaha cu no por bay riba tur cifra di crecimento economico. Gobierno di Aruba ta traha riba e cifranan di Departamento di Asunto Economico.
Esaki ta un di e puntonan, pero toch tin un tema, a bisa, cu mester menciona y esey ta e Proyectonan PPP. CAft a bisa cu nan ta preocupa pa e pagonan cu mester wordo haci pa cu e proyectonan aki.
E mandatario a expresa cu ora cu CAft mester tabata preocupa, "bo no a mustra bo dientenan y esey ta ora cu Gabinete di señor Mike Eman tabata cera PPP tras di PPP. Tur hende tabata sa kico e consecuencianan tabata, CAft no a bisa nada e tempo ey, pero awor nan a bisa nos bay kibra contract, bay renegocia y wak pa baha e sumanan ey".
Esaki ta cosnan cu a purba caba, pero cu ainda no tabata exitoso den dje, Wever-Croes a expresa.
Por mira cu parti di e menasa aki di 'aanwijzing' ainda ta bin door di e temporada di Gabinete di Mike Eman, a agrega.
