ORANJETSAD (AAN): Durante su ultimo reunion como Prome Minister di Aruba cu Commissie voor Koninkrijksrelaties (KOREL) di Eerste Kamer na Den Haag,
Mike Eman a ricibi palabra di aprecio y gradicimento for di e presidente di e comision, Paul Rosenmöller, pa su contribucion na Aruba y e relacionnan den Reino Hulandes.
E momento di despedida a tuma luga na final di e reunion, mirando cu Eman lo finalisa su funcion como prome minister na 1 di januari 2027. Rosenmöller a expresa su gradicimento na nomber di e comision completo, destacando e conocimento, pasion y experencia di Prome Minister Mike Eman. E presidente di KOREL a indica cu e comision a keda impresiona cu e dedicacion di Eman y cu su experencia lo sigui ta necesario pa fortalece e lasonan den Reino. Rosenmöller a expresa su deseo di bolbe mira Eman den un otro funcion, como un representante prominente di comunidad Arubano cu ta sigui comprometi su mes na bon relacionnan den Reino.
Un regalo simbolico cu un mensahe pa mañan: Durante e despedida, Eman y Rosenmöller a intercambia regalo. Prome Minister Eman a entrega na presidente y miembronan di KOREL un regalo cu escudo di Aruba incorpora den un compas. Eman a splica cu e escudo ta representa e orguyo cu pueblo di Aruba tin pa su isla, mientras cu e compas ta simbolisa e direccion cu mester guia e paisnan den Reino pa haya otro y traha hunto pa bienestar general, conoci tambe como e bon comun. Den su declaracion, Eman a destaca cu e bienestar general mester ocupa un posicion mas central den e manera cu e paisnan den Reino ta coopera y den e modelonan economico y politico cu ta guia sociedad.
Mike Eman tin compromiso pa sigui contribui na Reino: Prome Minister Eman a indica cu, despues di su salida como prome minister, e kier sigui reflexiona riba un modelo di cooperacion den Reino cu ta beneficioso pa tur. Segun Eman, ta importante pa sigui busca un modelo economico y politico cu tin un conexion mas fuerte cu bienestar general, tanto den gobernacion como den sociedad.
Eman a expresa su compromiso pa sigui dedica su mes na e obhetivonan aki eventualmente den un otro funcion.
Na e reunion tabata presente tambe Minister Plenipotenciario di Aruba na Hulanda, Mildred Schwengle, y Minister di Turismo, Transporte y Labor, Wendrick Cicilia.
