ORANJESTAD(AAN): Diamars a tuma lugar un conferencia di prensa, relaciona cu un encuesta riba forza laboral cu ta bay tuma lugar.
Durante e conferencia di prensa Desiree Helder di CBS a splica cu di 1 di November te cu 28 November 2021 Departamento di Labor y Investigacion (DAO), Oficina Central di Estadistica (CBS) y Centrale Bank di Aruba (CBA) lo tene e di diesun (11) Encuesta di Forsa Laboral (EFL 2021). E EFL 2021 tin como meta pa forma un imagen actual y completo di e mercado laboral di Aruba. Un meta importante di e EFL 2021 ta e midimento di e cifra di desempleo pa Aruba.
“Pa medio di e informacion compila tambe lo determina otro caracteristicanan y indicadornan importante di e mercado laboral cu ta necesario pa un analisis mas profundo di e mercado laboral, manera e.o. e grado di participacion y e nivel di educacion di e trahadornan”. E datonan y e tendencianan señala lo sirbi esnan cu ta stipula maneho, gobernantenan, investigadornan y empresarionan pa nan mehora y rafina nan maneho pa cu e mercado laboral, segun Helder.
EFL 2021 lo bay wordo haci digitalmente y telefonicamente y lo wordo ehecuta na un forma similar na Censo 2020. Pa e EFL 2021 a scoge un muestra di adresnan reparti riba henter Aruba cu a participa na Censo 2020 y cu a indica cu nan lo kier sigui traha hunto cu CBS pa futuro investigacionnan. E grupo aki lo bay ricibi e siman aki un e-mail for di CBS cu lo contene mas informacion di e investigacion. Riba dia 1 di November 2021 nan lo ricibi e link pa yena e cuestionario online. “Den e cuestionario lo puntra cierto informacion basico pa tur persona den e hogar, pero mayoria di e preguntanan lo wordo puntra solamente pa esnan di 15 aña bay ariba ya cu segun principionan di e Organisacion Internacional di Labor (ILO) nan ta wordo considera como parti di e forsa laboral di un pais”. Mester enfatisa cu e ta sumamente importante pa tur persona di 15 aña of mas cu wordo acerca pa yena e cuestionario pa medio di un e-mail of via telefoon, coopera pa yena e cuestionario completo, segun Helder.
El a sigui bisa cu e encuesta di Forsa Laboral ta wordo ehecuta pa haya mas informacion di e estado di empleo di tur persona 15 aña bay ariba, sea nan ta emplea, no emplea of no activo riba e mercado laboral.
Lo bay tin persona telefonicamente disponibel pa contesta cualkier pregunta cu tin, y tambe nan por asisti den e yenamento di e cuestionario. Nan lo ta disponibel di Dialuna pa Diabierna for di 8:00am – 12:00pm y di 2:00pm pa 8:00pm, den weekend for di 12:00pm pa 06:00pm na number di telefon: 5247433 (puntra pa e team di EFL 2021). Si yama y e liña ta ocupa, sigui haci intento pa haya un persona na liña. Tambe por manda un email na (Cette adresse e-mail est protégée contre les robots spammeurs. Vous devez activer le JavaScript pour la visualiser.) cu bo preguntanan, of pa solicita pa un cita pa yena e cuestionario via telefon.
Tur informacion lo ser procesa anonimamente y lo ser publica solamente den forma agrega. “Bo privacidad ta ser garantisa pa DAO, CBS y CBA”, Helder a indica.
Bo informacion lo contribui na mehora e bista riba desaroyonan riba e mercado laboral di Aruba. Pesey bo participacion na e EFL 2021 ta esencial.
El a sigui bisa cu pa mas informacion riba e Encuesta di Forsa Laboral 2021, bo por tuma contacto libremente desde 1 di November na number di telefon 524-7433.
