Director Ronny Irausquin:
*Ta pidi pa bin cu nan CV cla y pone un 'email address'
ORANJESTAD (AAN) – Director di Departamento Progreso Laboral (DPL), Ronny Irausquin, den entrevista cu DIARIO, a indica cu e registracion di personanan cu a solicita pa trabao na LNG e biaha anterior tey ainda y lo tuma contacto cu nan e biaha aki, atrobe. Ta aconseha nan pa tin nan CV cla caba.
“Na momento cu Gobierno keda cla cu tur e papelnan cu tin cu keda cla cu ne ainda, y yega asina leu cu nos tin cu cuminza busca hende pa locual ta trata LNG, e personanan cu nos tin registra lo wordo yama un biaha mas, pa wak si nan ta interesa ainda, pa bay sea un entrevista, of si nan ta dispuesto pa tuma un trabao pa LNG ora t’asina leu”, Irausquin a declara.
El a agrega cu fuera di esey tambe, e tempo ey nan a registra hopi compania cu tabata traha den e refineria e tempo ey, y aworaki ta cuestion di warda wak asina cu ta cla, y na momento cu Oficina di Labor notifica nos, nos ta start cu locual ta trata e proyecto LNG.
“Na banda di esey tambe, Minister di Labor mes a menciona den su conferencianan, cu ora cu t’asina leu nos lo habri un LNG Desk na San Nicolas, cual tambe nos ta preparando riba dje p’asina e keda cla nos start di biaha cu esaki”, Irausquin a relata.
Director di DPL a bisa tambe cu nan tin cu evalua ainda si nan ta bay laga esnan cu a registra caba, solicita di nobo. Pero sigur nan lo wordo yama, pasobra mirando e tempo cu pasa, DPL ta haya ta bon pa nan tin un update di nan tur.
“Por ta, nan ta trahando caba; of si nan desea di aplica pa traha cu LNG y si nan ta desea esey, kizas ta bon pa nan registra di nobo. Nos ta bin cu formularionan nobo tambe pa locual ta trata LNG”, señor Irausquin a señala.
Na prome instancia un di e exigencianan tabata cu e solicitantenan mester tin un poco experiencia den tereno di refineria. Director di DPL a bisa cu ta importante pa nan bin cu nan CV (Curriculum Vitae) cla atrobe, pa haya un update di nan. Incluso si yega asina leu, DPL por yuda nan traha nan CV. Por lo pronto interesadonan por keda pendiente di cualkier informacion cu DPL por saca pa publico tocante LNG.
“Nos lo saca tur informacion cu nos tabata tin den pasado atrobe, pa wak si e numbernan di telefon ta cuadra ainda. Awo, DPL lo pidi mas informacion, por ehemplo un email address, cu ta e forma mas facil pa DPL comunica cu e solicitantenan”, Director di DPL, Ronny Irausquin a conclui.
