Lisander Wernet, di C&C:
ORANJESTAD (AAN) – Lisander Wernet, Coordinador di Green Corridor, representando C&C, a participa den e conferencia di prensa yama pa Departamento di Obranan Publico (DOW), tocante e trabaonan di mantencion di e brug Spaans Lagoen, cu lo cuminza dialuna proximo.
Wernet a informa cu C&C ta bay tin su propio personal dirigiendo e trafico den coordinacion cu Cuerpo di Polis (KPA), cu cual nan a sinta hunto caba y yega na algun acuerdo, pa evita cualkier congestion den trafico, vooral den e brug alternativo, cu ta esun di Tele Aruba, unda por tin un trankilidad cu e trafico por core sigur.
Tambe lo tin personal cu ta haci señal cu borchi unda nan lo pone trafico 'slow-down', y KPA tambe lo tey pa brinda cualkier ayudo, unda kizas e trafico bira un tiki pisa. Wernet a indica cu e brug ta den bon condicion, pero simplemente un brug di structura metalico mester di un mantencion preventivo cada tanto tempo.
C&C a bin cu un plan di mantenimento, aproximadamente cada cinco aña pa hibe bek na su condicion original, Wernet a subraya.
El a menciona cu aña pasa a bin Aruba algun experto, basa riba recomendacion di autoridad contractual, pa haci un inspeccion visual y tecnico pa duna comentario con e estado di e brug ta. Finalmente, Wernet ta pidi comunidad comprension, pasobra e trabao aki ta esencial pa duna durabilidad na e brug, y lo haci tur posible pa keda cla den dos siman, si no tin imprevisto, logicamente.
