ORANJESTAD (AAN) – Segun un pensionado di gobierno, enberdad ta un bon noticia cu gobierno a cumpli e luna aki,
cu e pago di 5% cu a retene pa mas cu dos aña, na empleadonan publico, pa crea un fondo di solidaridad durante e pandemia di Covid-19.
E pensionado a comenta, na mesa di redaccion di DIARIO, cu e no ta papia pa su so, pero pa otro pensionadonan cu tambe tin e mesun inkietud y cu nan tambe ta spera cu pa December di e aña aki, e pensionadonan wordo paga nan gelijkbedrag completo, pues debi na e mesun pandemia gobierno a baha esaki na mitar.
El a bisa cu gelijkbedrag ta un derecho adkiri cu gobierno a dicidi di corta tambe, pero te aworaki e ministernan concerni no ta papia di e tema, mientras cu e pensionadonan ta un di e gruponan cu mas a keda afecta den e comunidad.
Oficina di impuesto si ta cobrando nan e sumanan atrasa cu ta saliendo aworaki, loke nan ta paga na AZV ta un porcentahe di como 18%, e costo di bida sin duda ta un peso grandi pa nan, y sikiera nan ta desea di haya nan suma completo di gelijkbedrag bek.
