ORANJESTAD (AAN) – Diadomingo cu a pasa, e Delegacion di Parlamento di Aruba cu a participa den e reunionnan di Interparlamentario (IPKO), a bin bek for di Sint Maarten.
Den conferencia di prensa di fraccion di MEP, Dialuna, parlamentario Shailiny Tromp-Lee a comenta cu despues di un siman basta intensivo den reunionnan tripartite y di IPKO e ta mira atras riba dianan fructifero, unda nan por a hiba dialogo, por a papia habri cu coleganan, y sigur esnan di e islanan cu ta experimentando e mesun situacion cu Aruba, unda tin dos concepto di rijkswet riba mesa, dos pa Aruba y uno cu ta concerni tur tres, pues pa Curacao y Sint Maarten tambe, y por a tuma e tempo pa comparti nan preocupacionnan, puntonan di critica, y deseonan pa cambio.
Tromp-Lee a splica cu esaki a tuma lugar den e tripartite, cu tabata un hopi bon reunion, y nan por a yega na un linea den conhunto unda ta enfatiza mas riba e similaridadnan cu ta existi riba e diferente islanan, como tambe e retonan cu tin despues di a surpasa e pandemia cu a afecta nos pais y henter mundo.
Tromp-Lee a bisa cu e reunionnan di IPKO a bay hopi bon, y cu e acento primordial, y cu ta conta tambe pa Curacao y Sint Maarten, ta e condicion cu tin aworaki riba mesa (e dos concepto di leynan di consenso) cu nan kier a enfatiza nan origen; esta, cu bao presion nan a keda poni riba mesa, unda Aruba como pais no tabata tin otro opcion cu bisa “si”.
E dama a sigui bisa cu e delegacion di Aruba a purba di enfatiza riba e escenarionannan, e situacion cu nos pais tabata confrotando e momento ey. “Ami sigur, a haci uso di e oportunidad pa splica nan na placa chikito kico e realidad ta”, Tromp-Lee a remarca.
Segun e parlamentario nan coleganan di Hulanda a compronde esaki y tabata ripiti locual el a splica nan tocante e realidad di Aruba, y e ta kere cu esaki tabata un logro riba su mes. E ta spera y kier mira mas dilanti cu e condicionnan lo cambia pa Aruba, manera e deseo ta. “Pero cu nos a planta e semia y cu nos a pasa e sentimento cu nos tin akinan, riba nos islanan den Caribe, mi ta kere nos a logra esaki sigur”, Parlamentario Shailiny Tromp-Lee a remarca.
