E ta crea un sentimento cu e bario no tin balor:
ORANJESTAD (AAN) – Parlamentario Alvin Molina, di fraccion di MEP, den conferencia di prensa reciente, a señala cu enberdad tin varios situacion cu ta preocupa nos comunidad, y cu ta temanan “ferfelu” y ningun di nan por bagateliza pero mester tuma nan na serio.
No obstante, no mester lubida cu mester percura pa futuro tambe pasobra tur e aspectonan “ferfelu” aki ta pasahero, y a pone como ehemplo e Basketball Port na Caya Sint Maarten na Village.
El a bisa cu e cancha di basketball aki tin mas di diez aña sin haya un atencion debido, y e ta hopi kibra, e board ta putri, luznan ta daña, e veld mes ta kibra, y den masha mal condicion, mescos e bankinan y e gazebo cu ta na werki. Molina ta puntra kico esaki ta comunica, kico e ta bisa na comunidad? El a comenta e teoria di “broken windows” cu ta bisa cu “mas bo laga bo comunidad bay atras, mas e lo sigui bay atras”.
Molina a bisa cu hopi biaha por wak den un veld di deporte, un borchi cu un simbolo manera un cara cu smile riba dje, pa mustra cu “nos a orguyoso di nos mes”. Sinembargo, e veld di basket ey no tin ni un borchi, pero si por imagina esaki kico e lo por a comunica? E borchi ey lo a bisa “We are not workers”, “we don’t deserve attention”, “nos no tin balor”. Molina a subraya cu esaki ta loke un cancha cu ta ser permiti pa keda asina, ta comunica. Esaki ta loke ta wordo geprint den cabesnan di e habitantenan, y e muchanan cu ta crece den e area aki, no solamente den e bario aki pero den tur e barionan rond cu lo desea di haci uso di un bunita veld, cu e suppose di ta, pero cu tur dia ta confronta cu e realidad aki. “Nos no tin balor: esaki ta loke ta wordo comunica na e muchanan, na e hobennan”, Alvin Molina a reitera indicando cu “di ki otro manera por bisa cu esaki ta contribui na un desaroyo positivo, di nos hobennan”.
El a agrega cu esaki ta un preocupacion fundamental cu tin na Aruba: “ta con nos por yuda nos hobennan desaroya na un manera positivo”, e parlamentario a remarca. E ta puntra, di otro banda con por preveni y evita cu nos hobennan bay riba un caminda malo? El a comenta cu di mes, tin hopi cos importante cu por menciona den e tema aki, manera enseñanza, aspecto financiero, situacion familiar, social, hudicial, y tur esaki tin di haber, eventualmente, cu e seguridad di e pueblo na Aruba.
Molina ta corda con antes deporte tabata na Aruba y sigur na San Nicolas, cu tur siman tabata tin wega di basketball, baseball, softball, cu e muchanan-hoben tabata bin hunto cu nan famia y amigonan pa pasa momentonan positivo, socializando, creando conexion cu otro, cu famianan, cu miembronan di comunidad, locual tabata hopi leuk y sano, pero ademas, e conexion ey ta yuda pa hende crea un comunicacion cu otro, support otro den nan tareanan, cuida cas di otro famianan, cuida yiu di otro, motiva, guia y coregi nan; preveni pa evita cu nan ta tuma un mal caminda. Y incluso ora tin gruponan di hende ta frecuenta otro e ta yuda pa nan mantene sano y limpi nan medio ambiente.
