ORANJESTAD (AAN): Siman pasa, Parlamentario ing. Carlos A. Bermudez di fraccion di AVP,
a manda un serie di pregunta na Ministro Geoffrey Wever conforme Reglamento di Ordo di Parlamento.
El a haci esaki despues di a tende Ministro di Asuntonan Economico papia durante tratamento di presupuesto 2025 y di e plan “Programa di Gobernacion 2025-2028” po conclui cu Gobierno AVP-Futuro ta pro pa construi casnan social. Den cuadro di esey el a haci siguiente preguntanan.
(1) E kier sa di Ministro ki tempo e reunion cu Fondo di Pensioen APFA lo bay tuma lugar, segun ta poni den e Programa na pagina 35.
(2) E kier sa di Ministro ta cuanto cas social a wordo construi den añanan 2017 pa 2024.
(3) Den segundo nota di cambio di 6 Maart 2025 pa presupuesto 2025, e ex-Ministro di Finanzas y Cultura a pone un suma di 17 miyon Florin como prestamo na FCCA pa construi casnan social.
(4) E kier sa di Ministro Wever si acaso den añanan 2017 pa 2024 si Gobierno a cera un prestamo cu FCCA pa construccion di casnan social.
(5) Si acaso contesta riba pregunta 4 ta positivo, por bisa ta ki suma di placa, y ki porcentahe di prestamo.
(6) Cuanto cas social a wordo construi desde 2017 pa 2024. Cu excepcion di e proyecto di Kiviti.
(7) Cuanto famia a yega na remarca pa huur un cas nobo recien construi den añanan 2017 te cu 2024.
(8) Ministro por duna indicacion si tin un plan di kavel suministra pa ex-Ministro di Finanzas pa cu e proyectonan di edificionan social di FCCA.
(9) Si acaso contesta na pregunta 8 ta positivo, Ministro por duna indicacion na cual aña of añanan e plan di kavel a wordo traha?
(10) Si acaso contesta na pregunta 8 ta positivo, Ministro por indica ta cuanto percela esaki ta encera den e plan di kavel menciona aki.
