Aproba cu sosten unanime di Parlamento:
ORANJESTAD (AAN) – Parlamentario Arthur Vallejo, den conferencia di prensa di fraccion di MEP, a elabora tocante un mocion cu su persona a presenta durante tratamento di Presupuesto 2022 y cual a wordo aproba unanimamente den Parlamento.
Vallejo a splica cu esaki ta e mocion number 14 cu a haya sosten unanime, pero ademas el a papia riba diferente tema cu el a discuti cu varios minister, entre otro Minister di Economia, Salud y Educacion.
Den e mocion # 14, Parlamentario Vallejo ta urgi Gobierno pa no fusiona Horacio Oduber Hospital y Instituto Medico San Nicolas (ImSan).
Vallejo a indica cu cualkier di su sinonimonan tambe ta valido, sigur sin tin un rapport independiente, ya cu e ta tende hende papia di “rapport aki rapport aya”, pero ki coincidencia cu e autor di dicho rapport ta consehero pa hopi aña, di un di e partidonan involucra.
Vallejo ta señala cu un rapport independiente ta loke mester pa evalua e aspecto economico, financiero, laboral y social, y si tin un beneficio pa haci lo anteriormente menciona.
“Cu informacion treci aki dilanti, mi ta pidi tambe respet pa cu e deseo di e organo di mas halto di Pais Aruba y su representantenan, pa cu e mocion # 14 aki, cu tur 21 Parlamentario ta sostene. Respet di tur esnan den e Institucion di mas grandi, mas costoso y menos eficiente den salud, esta Dr. Horacio Oduber Hospital, ta haci pleito y excuse diariamente pa frena desaroyo di ImSan y pone bao presion, obstaculizando y saboteando San Nicolas su Hospital”, Parlamentario Arthur Vallejo a enfatiza.
Comportacion anti-competitivo:
Parlamentario Vallejo a para un rato keto pa enfoca riba comportamento anti-competitivo, yama tambe comportacion monopolista di instancianan dominante, cu rutinariamente ta uza nan tamaño y poder pa perhudica y exclui nan rivalnan di mas chikito.
“E abusonan aki ta wordo cometi den dia cla, dilanti henter un pueblo y gobierno, sin wordo para debidamente. Y nos ta puntra nos mes ‘di con?’. Di con nos mester para wak e tipo di abusonan di poder aki pasa? Esaki ta debi na un cambio di pensamento ideologico den cuadro di eficiencia? E ta di sumo importancia pa mantene y cuida mercadonan husto y habri pa tur competidor. Tin por lo menos tres razon fundamental, pa compromete nos mes cu mercadonan husto y habri, pa negoshinan chikito, como maneho anti-monopolio”, Parlamentario Vallejo a subraya.
Den e siguiente edicion di DIARIO lo sigui elabora riba e relato interesante aki di Parlamentario Arthur Vallejo.
