Actitud di oposicion na caminda di COHO ta cuestionabel --- *Dia 7 di Mei 2015 Mike a habri caminda pa COHO pa Aruba --- *Hasta nombramento di Gouverneur, Hulanda a kita for di Eman
ORANJESTAD (AAN) — Den pasado mundo tabata tin respet enorme pa Aruba pa un motibo grandi.
Na e momento cu bisa “Aruba” y e interes di Aruba tabata na wega, Arubianonan tabata bira un solo entidad cu tabata lanta para pa bienestar y interes di nan pais.
Cu e realidad aki nos dilanti, mester tuma nota di e posicion di oposicion na Aruba, forma pa AVP, cu ta lubida cu e origen di tur problema cu Aruba conoce cu Hulanda actualmente, ta cuminsa cu AVP cu a laga e caha di placa di Aruba sin bom.
Papel sigur tin pacenshi y ta riba papel tin oprimi con Hulanda a introduci medidanan financiero pa Aruba cu a keda financieramente kibra dor di e forma cu Gobierno Mike Eman a abusa di e confiansa di Pueblo di Aruba, cu a bira victima di mentira politico.
Berdad a wordo scondi pa e Pueblo di Aruba cu na 2013 ora el a vota pa Mike Eman no tabata haltura cu ya instancianan y organisacionnan di Aruba tabata prepara rapportnan pa mira con ta atende cu e desastre cu a wordo crea cu mitar BBO, creacion di un debe nacional y un fondo di 1.6 Biyon pa gasta sin responsabilisa ni na Hulanda ni na Parlamento.
Awe Mike Eman y AVP mester tin berguensa di papia di e relacion entre Reino y Gobierno di Aruba, ya cu Hulanda a kita for di Mike hasta e derecho di yuda dicidi kende lo a bira Gouverneur di Aruba.
Ni den esaki Hulanda a confia Mike Eman y a sigui e proposicion di Mike Eman.
Ta bira tempo pa e agitacion actual na Aruba yega na un fin y esaki no ta peligro cu por tin cual partido lo ta na mando.
Aruba ta bira victima di antagonismo politico abusivo dor di hustamente e persona cu a percura pa tur loke awe ta realidad di Aruba, cu ta Mike Eman cu a destrui economia y situacion financiero di Aruba, manera papel y mas papel ta duna prueba.
Gasta mucho tempo na loke henter Pueblo mes a realisa for di 2017 ora Mike mester a entrega e cantidad di voto cu a wordo deposita riba su nomber, no ta nos proposito.
Pero na fin di un siman cu Aruba ta lucha cu Hulanda pa motibo di e destruccion financiero di Aruba cu Mike Eman a origina, mester pone tur cos na nan lugar ya cu berdad tampoco ta muri mescos cu loke ta riba papel, manera e acuerdonan di Mike Eman pa entrega Aruba na supervision di Hulanda, ta keda existi y drenta historia.
