PANAMA CITY: Centenares di trucks di Panama y Centro America cu ta carga cu cuminda y otro producto,
ta sigui keto bay blokea riba e Highway Interamericana, siendo cu e scarcedad di hopi alimento y demas articulo na e capital di Panama y otro centronan urbano, ta empeorando desde cu protestanan a start contra e aumento drastico pa costo di bida cu a cuminza tres siman pasa.
Por lo menos tres docena di truck di Centro America a keda blokea desde siman pasa den area di ciudad di Santiago, cu ta e capital di e provincia central Veraguas, cu ta situa 250 kilometer di e capital.
E punto aki riba Highway Interamericana tabata escenario Diamars siman pasa di un bataya entre manifestantenan y Polis Nacional cu a produci herido, y hopi destruccion di propiedad publico.
Tabatin centenares di hende protestando, algun cu capuchon riba cabez, cu tabata arma cu piedra y molotov cocktails, kendenan a kima wielnan di auto.
Exactamente Diahuebs 7 di Juli e protestanan aki a cuminza, unda pueblo via di Sindicato y Gremionan ta exigi rebaho di prijs astronomico di gasolin, y tambe rebaho di prijsnan di cuminda.
E chauffeurnan di Truck mes ta haya nan mes obliga na drumi riba caya, pero ta pasando masha intrankil mes, nan mes casi no tin cuminda, y tin di defende nan truck cu cada rato manifestantenan ta trata di habri e containernan.
E trucknan blokea ta bin di diferente pais di Centro America, y nan ta transporta alimento, bebida, y materia prima. Hasta un convoy di trucknan yena cu cuminda, cu a ser yama ‘Caravana Humanitario’, cu mas di un docena di truck di e provincia di Chiriqui, cu ta suministra mas di 80% di berdura y fruta cu e pais ta usa, tambe a wordo blokea na altura di Vigui, cu ta 330 kilometer leu di Panama City. Parce cu hombernan arma a stop e convoy aki. Aki ta unda cu tanto Sindicato como Gremionan a distancia nan mes di esaki.
Resultado di tur esaki ta cu tin un emergencia di alimento na Panama. Tur coolers di fruta y berdura na Supermarketnan ta varios dia caba bashi, y awor hasta aroz a bira scars.
E protesta ta inclui un welga indefini di docentenan, y esey ta pone cu tin miles di alumno sin haya les. President Laurentino Cortizo di Panama a core introduci subsidio temporal pa combustible y algun cuminda, y reduci 10% di gastonan gubernamental. Sindicato y gremionan ta haya esaki como ‘no suficiente’.
Iglesia Catolico na Panama a mustra cu nan ta buscando forma pa pone tur partido sinta na mesa pa yega na un solucion.
