Necesidad di vivienda pa huur na Aruba ta grandi:
ORANJESTAD (AAN) -- Den poblacion tin un necesidad grandi di vivienda pa huur, y tin famianan cu despues di a biba entre 10 y 15 aña den un cas modesto, pero bon y cu tin un patio grandi, e propietarionan ta informa nan cu nan tin cu sali, busca un otro cas, pasobra nan ta bay basha abao e cas unda nan ta biba, pa nan por drech’e, renob’e, remodel’e, pa huur’e pa un suma basta mas halto.
Tristo ta cu e famianan ta haya e noticia pero nan no wordo ofreci ni un alternativa.
Pero tambe ta asina cu e intencion ta pa traha apartamentonan den e tereno rond di e cas. Logicamente, e doñonan tin tur derecho di haci esey, aunke e huurdonan ta bon pagador. No obstante, e famianan cu tin cu sali for di e cas (ta varios famia ta den e situacion aki, na diferente bario), no por haya otro cas cu ta acomoda na nan entrada. Tin di e famianan aki cu ainda ta hayando menos salario bao capa di Covid-19 y Labor no ta haci nada, pero nada, den e casonan aki.
Tin hende cu ta traha den hotel, por ehemplo, of supermercado cu mester haya un cas unda e bus pasa alomenos 500 meter leu for di e cas pasobra nan ta depende di transporte publico pa bay trabao y bin cas bek. Pero ta hopi dificil pa nan ubica den un lugar unda transporte ta accesible. Otro aspecto fundamental ta e prijs. Un apartamento chikito di un camber y un baño nan ta pidi un huur cu no ta baha di 1.300 (mayoria ta mas caro). Si ta trata di un cas mes, e huur ta na mas cu 1.500 florin. Tin hende a comenta na DIARIO cu nan a bay wak un par di cas, pero prijs ta 2.500 pa 2.700 florin y leu. Arubus no ta pasa cerca y autobus ta pidi nan entre 6 cu 10 florin. E situacion aki ta preocupante principalmente pa hende di edad grandi cu ainda tin cu traha pa sobrebibi, pasobra ta imposible pa nan biba si solamente pension di SVb. Vivienda sigur ta un producto cu a bira sumamente costoso, no ta asina sin mas pa haya un cas pa huur, y no tur hende cu tin e necesidad ta bin na remarca pa cumpra un cas.
Di otro banda, rond di Aruba tin cantidad di cas abandona, incluso den centro di ciudad. Casnan cu un tempo atras tabata tin su balor y awo ta full kibra, cu mata cu casi ta tapa nan dak, sushi, bo ta wak djaca ta keiro aki aya. Ni un hende sa di ken e cas ta, pero yen di personanan sin dak si ta drenta drumi y haci necesidadnan aden. Un berdadero lastima! Siendo cu e necesidad di vivienda pa hopi ta un problema dificil pa resolve.
