ORANJESTAD (AAN) – E conferencia di prensa di Gobierno, Dialuna 14 di Februari awo,
tabata na encargo di Minister di Husticia y Asunto Social, señor Rocco Tjon, ken a enfoca riba e proyectonan (inversionnan) cu ta bay tuma lugar na Instituto Coreccional KIA.
E mandatario a cuminza bisando cu ora ta trata di un Instituto Coreccional e maneho, practicamente, ta hopi “straight forward” pasobra internacionalmente e ta wordo auditoria riba diferente aspecto. Esaki ta nifica cu e maneho ta wordo delinea riba e procesonan aki, el a acentua.
Minister Tjon a splica cu un di e aspectonan aki ta seguridad y higiene, y e otro, hopi importante tambe, ta atencion medico cu por brinda na tur e personanan cu ta cera den KIA, pero tambe e programanan cu por ofrece na nan, cu intencion di percura cu nan por reintegra y resocializa bek na un manera exitoso.
E mandatario a agrega cu ademas ta hopi importante e organizacion como tal, pasobra e structura organizativo ta haci posible pa por atende tur e diferente aspectonan aki, y esaki ta hopi importante tambe.
Minister Tjon a señala cu hopi biaha e ta haya e pregunta di prensa “ki atencion tin pa KIA” y tocante esaki el a aclarea: “Mi mester bisa cu den e prome tres lunanan ya caba nos a aloca 1.5 miyon florin pa inversionnan cu mester tuma lugar na KIA, y mi ta haya hopi lamentable cu e informacionnan aki no ta yega tampoco na esnan cu ta traha na KIA, pero mi kier asegura nan si, cu tin atencion pa nan”, Minister di Husticia a declara.
E mandatario a sigui bisa cu e 1.5 miyon aki, ta netamente pa atende cu diferente di e aspectonan cu el a caba di menciona, y el a subraya cu un hopi importante cu falta den loke ta seguridad y higiene ta e “combi wcnan” y esaki ta causa hopi molester na KIA y consecuentemente esaki ta afecta e parti di seguridad. Banda di esey, tin diferente renovacion cu ta bay tuma lugar, pero den e parti di infrastructura, den e diferente afdelingnan y esaki, obviamente, tambe ta eleva e seguridad. E mandatario a duna di conoce tambe cu e portanan sluits ta bay wordo reemplaza, y lo introduci un maneho di sistema electronico cu no solamente lo percura pa e seguridad wordo eleva, pero na mes momento e trahadornan mes ta wordo proteha, y consecuentemente ta evita cu un trahador por bay cas cu un yabi, cu tur e consecuencianan cu esaki por tin. Y na mesun momento, nan no tin nodi cana mas cu un boshi yabi. Esaki ta proyectonan specifico, e minister a menciona, y nan a wordo presupuesta. E fondonan tey y nan a wordo aloca for di aña pasa, segun e dignatario. “Y, un bez cu presupuesto 2020 wordo aproba, atrobe tin un suma aloca pa por sigui inverti den nos Instituto” Minister di Husticia Rocco Tjon a señala.
