Minister Dangui Oduber a duna di conoce:
- Pa Aruba haya miho prijs y servicio
ORANJESTAD (AAN) – Minister di Salud y Turismo, señor Dangui Oduber, a sigui splica den conferencia di prensa, cu despues di e investigacion cu a tuma lugar den cuadro di “modelo F-3” pa loke ta cuido basico di salud, diferente punto di atencion a keda señala, cu ta bay wordo inclui den e Roadmap, y cu su ministerio ta trahando riba nan na e momentonan aki, pa asina yega na e puntonan di accion cu ta bay wordo implementa.
E puntonan di accion cu a wordo señala durante e investigacion aki, ta cu Aruba tin necesidad pa reinforza su “Eerste Line”. Tabata tin punto di atencion tambe pa e laboratorionan cu mester traha mas eficiente y reduci e costonan. Tambe mester haci un compra mas eficiente di cuido den exterior.
E dignatario a menciona cu mayoria di pashent cu no por wordo trata na Aruba ta ser manda pa Colombia; den pasado nunca tabata tin un destaho publico cu a wordo haci na Colombia, pa asina Aruba por haya miho prijs y servicio.
Na e momentonan aki tin destaho publico cu ta canando, cu diferente hospital y si tur cos ta bon na comienzo di aña 2023 e escogencia lo tuma lugar. Esaki ta un destaho publico cu pa prome biaha ta wordo organiza pa asina por haci compra di cuido na un manera mas eficiente y eficaz. Tambe ta bay pone atencion na e aspecto organizativo di e cuido cu ta wordo duna na Hospital y na e cuido farmaceutico. Oduber a indica cu e boticanan ta hayando atencion tambe.
Anualmente, AZV ta paga casi 30 miyon florin na remedi y esaki a wordo identifica como un punto di accion cu lo por logra reduci costo tambe, den e situacion dificil cu Aruba ta aden, e mandatario a bisa.
El a señala cu pesey algun tempo atras, gobierno a anuncia cu no ta bay sigui cu e introduccion di “eigenbijdrage” (propio contribucion), pasobra CAft tabata tin otro pensamento y a bisa cu nan no ta di acuerdo cu gobierno su vangnet, cual ta mucho amplio, y tambe cu e no ta di acuerdo cu e “begrotings fonds”. E dignatario a agrega cu semper gobierno ta condiciona y a splica CAft desde inicio cu na momento cu, en caso cu introduci un eigenbijdrag mes, e lo mester bay conhuntamente cu un vangnet pa proteha e grupo di mas vulnerable.
Pero, e mandatario a agrega, gobierno a haya otro alternativa, cu ta cuadra tambe cu e pensamento y recomendacionnan di e rapport Hubben-Batenburg, pa bay busca e sparmento aki den e prijs di remedinan. Esaki ta algo cu a wordo haci y comparti cu CAft tambe. E ta bay genera dos biaha mas placa cu e contribucion propio mes, y esaki ta un calculacion conservativo, y pesey gobierno a tuma e decision cu, definitivamente, e introduccion di e eigenbijdrage no ta continua, e dignatario a remarca.
