Meverly Romano, PR di Servicio di impuesto: *E ta cay den mesun categoria cu onderstand
ORANJESTAD (AAN) –Meverly Romano, Relacionista Publico di Servicio di Impuesto, den entrevista cu DIARIO a referi na e hecho cu tin hende ta considera cu cobra impuesto riba FASE Uitkeuring ta inhusto, y el a splica cu e yudanza aki no ta onbelast pa Inkomstenbelasting.
El a subraya cu FASE ta un tipo di entrada pa cual no tin dispensacion riba dje pa e ley di Inkomstenbelasting.
“E ta cay den e mesun categoria por ehemplo pa e personanan cu ta ricibi onderstand. Nan tambe ta haya un ayudo financiero di gobierno debi cu nan ta den un situacion cu nan mes no por provee pa nan mesun entrada.
“FASE tambe ta un ayudo financiero di gobierno causa pa e pandemia, pa esnan cu kizas a perde trabao, y e tipo di ayudonan aki, berdaderamente gobierno ta duna nan pero e tipo di entrada aki no ta cay bao dispensacion pa Inkomstenbelasting. Y pesey departamento di impuesto tin cu aplica e ley di Inkomstenbelasting y nos ta cobre. Pero manera mi a bisa, e personanan cu a haya FASE ni mas cu nan a haya 950 florin pa diesdos luna mes, nan ta yega na un total di 11.400 florin, pues nan no ta bay pasa e grens di 28.862 florin, esey ta nifica cu a ricibi FASE solamente, nan no ta bay paga Inkomstenbelasting. Pero mester tene cuenta si, cu si e persona tabata ricibi FASE y e tin un otro side job cu e ta haci, e mester declara tur su entrada cu el a ricibi, inclui su side job(nan). Anto e ora ey Inspector di Impuesto ta bay wak kico ta bay ta e suma total cu e persona a ricibi den aña 2020; a base di esey, nos ta cobre segun e reglanan, pasobra Departamento di Impuesto ta un instancia cu tin cu traha cu e leynan vigente. Lamentablemente, nos no por discuti cu un cliente si ta husto pa cobra of no. Nos ta sigui e reglanan di ley. Y e entrada di FASE, no ta un entrada cu tin dispensacion di impuesto riba dje, pesey tambe ora cu nos fiha e cobranza definitivo di Inkomstenbelasting, mesora nos ta fiha tambe e prima definitivo di AZV, AOV/AWW. Y nos ta wak con halto e entrada ta y asina nos ta determina si e persona ta bin na remarca pa un descuento of no. Pues, pa esnan cu ta bisa cu ta inhusto, mester pensa tambe cu, por ehemplo, un persona cu ta haya onderstand tambe ta den e mesun situacion. Esakinan ta tiponan di entrada cu gobierno ta duna como ayudo financiero pero esey no ta nifica cu nan ta onbelast pa Inkomstenbelasting” Meverly Romano a reitera, pa conclui e entrevista aki.
