Opinion Publico pa atencion di Minister di Salud:
- Ohala AZV por a cubri alomenos costo di strips
ORANJESTAD (AAN): E siman aki DIARIO a ricibi opinion publico di un adulto mayor, cu ta diabetico.
El a expresa su mes cu hopi sentimento, kico ta encera e gastonan cu un diabetico cu ta biba di un pensioen di behez limita, manera e di cu su caso ta, tin cu haci, cu excepcion di e pildo cu AZV ta cubri, pa tur hende cu ta sufri di malesa di sucu.
Si cuminza cu e alimentacion, tur hende sa con caro fruta, berdura, y vegetal cu ta basico pa un diabetico ta, y ni papia mes di carni (incluyendo carni mula), pisca, galiña, etc., cu a bira casi impagable, y awendia dia locual ta cereal, aros, bonchi, lenteha, etc. tambe a subi di prijs sin piedad. Y busca pa come locual ta resulta un tiki mas economico, no ta yuda un diabetico ta bon nutri.
Y fuera di tur esaki, e diabetico tin cu controla su sucu regularmente. Antes, bo tabata bay consulta di docter di cas, y e asistente prome cos cu tabata haci ta coi e mashin y check bo sucu, y tambe check bo presion. E presion ainda ta wordo controla den consulta pero bo sucu no mas, pasobra e strips ta hopi caro, hasta e hanguanan pa prik e prijs a subi.
Esaki sigur ta un peso economico fuerte pa e diabetico. “Suma esaki na e costo di alimentacion, y saca bo mesun conclusion” e ciudadano a bisa.
Un paki di strips den botica ta pasa e prijs di 40 florin, y ta papiando di un cahita cu 10 strips, esnan di 50 ta dos biaha mas caro, y ni papia mes di esun di 100 strips. Tin un lugar so cu tin un miho prijs, cu ta un agencia di productonan natural, pero e prijs cu antes tabata hopi faborable, awo a subi haci e producto caro, no tanto manera den botica, pero tambe no asina accesible pa un adulto mayor, pensiona, cu un entrada chikito.
E mashin mas moderno pa check sucu tambe ta caro, y hopi adulto mayor diabetico, ta keda uza nan mashin bieu cu ainda ta duna cifra, pero ora e ta daña tin cu warda su tempo pa por cumpra un nobo.
P’esey, locual e adulto mayor aki ta puntra y ohala Minister di Salud ta dun’e oido, ta pakico AZV lo no cubri sikiera un caha di strips pa luna? Tin hende ta check un bez pa dia, tin otronan mester haci’e a lo menos dos bez, segun nan situacion.
