Parlamentario Evelyn Wever-Croes:
ORANJESTAD (AAN): Den conferencia di prensa di MEP, lider di fraccion Evelyn Wever-Croes, a haci un pregunta importante: con nos kier sigui cu turismo?
“Turismo berdad ta e pilar principal di economia di Aruba. Pero, hunto cu crecemento, nos ta sinti tambe e presion riba trafico, vivienda, infrastructura y nos medio ambiente. Y pa esey tin un solucion: “high value low impact tourism model”. Awe mi kier papia di e problema y e solucion.
Di con? Pasobra sobre turismo, overtourism ta afectando nos calidad di bida. Algun ehempel: (*) Algun caminda bunita na Aruba ta haya demasiado turista, y esaki ta afecta nos medio ambiente. (*) Molester di Airbnb den areanan residencial. (*) Infrastructura, specialmente trafico, no por carg’e. (*) E demanda di turistanan pa appartment y Airbnb ta hisa prijsnan di cas, y nos hobennan no por haya un cas pa biba. Tur esaki ta afectando gran parti di comunidad.
‘High Value - Low Impact’: El a splica cu su Gobierno, esta Gabinete Wever-Croes 2, despues di pandemia, a scoge pa cambia e rumbo, pa un rumbo nobo: modelo di turismo “High Value, Low Impact”.
“Esaki kiermen: crea mas balor economico cu menos presion riba nos pais y nos comunidad. Pero nos no ta mira cu e maneho aki ta wordo ehecuta. Al contrario, nos ta mira cu e maneho actual ta pa crea mas vuelo aereo pa Aruba y pa aumenta e cantidad di turistanan cu ta bin Aruba. Esey no ta baha e presion ni e impacto. Es mas, e minister, despues di un aña den gobierno, ainda no tin un maneho. El a presenta un draft na stakeholders, pero te awe no por presenta un maneho. Y cada dia cu pasa sin cu tin vision, sin cu tin maneho, e daño ta bira mas grandi riba nos pais, nos medio ambiente y nos famianan.”
“Y pesey ta importante pa nos haci nos mes un pregunta honesto: nos kier mas turista, of nos kier mas balor di turismo?” Lider di fraccion di MEP a compromete cu desde oposicion, lo forza e gobierno aki pa bay den direccion di un turismo mas sostenible pa Aruba.
