ORANJESTAD (AAN) – Minister di Husticia y Asunto Social señor Rocco Tjon, pa conclui su conferencia di prensa Diahuebs,
a splica cu na aña 2020 Aruba a “treed toe” (drenta) den un convenio di cooperacion, atravez di e “Stichting Beheer ICT Rechtshandhaving”.
E mandatario a splica cu esaki ta un fundacion cu ta percura pa tur e departamentonan di informacion y inteligencia, pero tambe e departamentonan den e cadena hudicial, pa loke ta e parti di ICT, ta mas coordina cu otro, pa di e forma ey nan por brinda un miho producto, y combati criminalidad na un manera mas eficiente y efectivo.
A base di e proyecto aki tin diferente proyecto tambe cu ta bay wordo ehecuta y Diaranzon e minister tabata tin un reunion sumamente positivo cu e raad van toezicht y e director di e fundacion menciona, y Aruba dentro di poco lo bay apunta su miembro, den e Hunta di Supervision, pa esaki; pero e ta vacante ainda, segun Minister Rocco Tjon.
“Na mesun momento nos a haci palabracionnan concreto cu den e prome cuartal di otro aña lo bay introduci un proyecto piloto akinan na Aruba, pa Cuerpo Policial, caminda den e autonan di polis nos ta bay introduci e ‘mobile data terminals’. Esaki ta bay facilita e trabao di e agentenan policial, ta bay eleva nan seguridad, pero hopi importante tambe, e ta bay haci posible cu nan por brinda un miho servicio na tur e ciudadanonan”, minister Rocco Tjon a duna di conoce.
E mandatario a indica tambe cu pa final di November proximo, lo introduci e “mobile app” cu a wordo diseña specificamente pa Cuerpo Policial di Aruba, unda cu atravez di smart phones pa polisnan cu ta riba caya por haya acceso na informacion, y di e forma ey tambe por brinda un miho servicio.
“Pero hopi importante tambe mirando e hecho cu riba e smart phones aki tambe lo tin un dispatch module, caminda e polisnan ora cu atende cu caso nan por haya informacion directo di e ‘centrale meld kamer’ pero e central sa mesora unda polis ta via e module aki, e ta hopi importante tambe pa e seguridad di agentenan policial”, e dignatario a señala.
Pa fin di December lo introduci e proyecto aki y na inicio di otro aña lo cuminza cu e proyecto piloto pa loke ta e “mobile data terminals”, cu ta un ekipo cu for di añanan 90 a wordo introduci na Hulanda, y awor ta e momento cu Aruba lo conoce esaki pa eleva e seguridad di agentenan policial y brinda un miho servicio na tur ciudadano. Asina Minister di Husticia y Asunto Social a conclui su conferencia di prensa.
