Rocio Burgos a splica cu e ta pa recauda fondo
ORANJESTAD (AAN): Diahuebs mainta durante un conferencia di prensa convoca na edificio Piso 3 den Caya Betico Croes, a suministra informacion di un evento di Walk & Run cu ta ser prepara door di e organizacion di WOW Aruba.
Rocio Burgos a splica cu WOW Aruba ta organizando un fundraising cu lo ta un 5K Fun Walk and Run “Walk the Talk” y e lo tuma lugar Diadomingo, 23 di April 2023.
WOW Aruba ta un organizacion di hende muhe cu enfoke riba e crecemento di cada un miembro den nan bida professional y tambe personal. Un di WOW Aruba su pilarnan principal ta pa duna back na comunidad y instancianan caricativo. E meta di e “Walk the Talk” ta pa cada participante cana pa e motibo cu nan ta desea, sea ta cana pa bo mes, cana pa un famia, cana pa salud, cana pa sostene un organizacion, pa cada participante cana pa locual nan kier para p’e.
Cu e fundraising aki WOW tin e honor di recauda fondo pa Fundacion Guia mi & Centro Famia di Criansa Aruba. Abase di un encuesta cu e miembronan, nan a scohe e organizacion nan aki cu sin duda mester di e sosten. Centro Famia di Criansa Arubano ta e unico instancia na Aruba actualmente cu ta atende cu locual ta cuido di criansa. E fundacion a worde lanta den 2004 y ta haci un impacto hopi grandi riba cada mucha.
E caminata “Walk the Talk” lo tuma lugar Diadomingo 23 di April venidero, y ta start pa 7’or di mainta. Registracion lo cuminsa pa 6:30 di mainta caba. Nan ta pidi contribucion di ta 25 Florin pa adulto y pa mucha di 5 pa 12 aña lo ta 15 Florin. Tur mucha bou di 5 aña por join gratis.
E ruta cuminsando na Eagle Beach Boardwalk, bay te na Embassy Suites, y termina back na Eagle Beach Boardwalk. E incripcion ta inclui fruta y awa.
Pa registra por yena e form aki:
WOW Aruba ta invita comunidad pa join nos caminata pa un causa cerca di nan curason. Alavez Organizacion WOW Aruba kier extende palabra di agradecimento na tur sponsor cu a kere den e evento aki.
