ORANJESTAD (AAN): Presidente di Organisacion di Pensionadonan Publico di Aruna (OPPA) ta expresa algun bunita palabra den cuadro di Dia di Pensionado.
Estimadonan pensionadonan,
Pa nos ta un honor y placer di por dirigi algun palabra di aprecio y gratitud riba e ocasion special aki, Dia di Pensionado.
Henter bida, e pensionado a traha duro, a dedica su energia, y a duna hopi di su tempo pa yuda desaroya y fortalece nos comunidad.
Su labor y sacrificio no a bay sin reconocemento y awe nos ta rindi honor pa e contribucion valioso cu e pensionado a duna durante su trayecto di trabou.
Nos ta celebra awe no solamente retiro, di e pensionado, pero mas importante, nos ta celebra su dedicacion, compromiso y trabou duro cu a pone nos riba caminda pa un futuro miho.
E pensionado a demostra nos kico ta e balor di persevera den bida.
Nos ta sinti un profundo gratitud pa tur locual e pensionado a logra den nos comunidad.
Awo cu el a bay un paso atras for di e trabou di dia pa dia, e merece felicidad, salud, paz y trankilidad.
Su experiencia, sabiduria y conseho ta algo valioso pa henter nos comunidad.
Mi ta spera cu e sigui gosa di e premio di retiro cu e merece.
Sigui inspira nos cu bo energia y pasion pa bida.
Mi kier a recorda tur pensionado cu semper e tin un luga special den nos curason y den comunidad.
Di fondo di nos curason, masha danki pa tur e esfuerzo y pasion cu bo a invertí den bo trabou y den bo bida.
Masha pabien y pasa un feliz dia di pensionado!
Na nomber di OPPA,
- Valdes.
Presidente
