ORANJESTAD (AAN): Diamars mainta durante conferencia di prensa na e Mobile Unit staciona riba parkinglot di ImSan na San Nicolas pa duna vacuna y booster shots,
e funcionario Rino Hermans di Bureau Rampen Bestrijding Aruba a splica riba e idea pa a bin cu e Truck special aki pa yuda den e proceso di duna vacuna.
Segun Hermans, tabata di Februari 2020 te cu September 2020 ora cu Aruba a cuminza duna vacuna contra Covid-19 den tres diferente distrito na Aruba, esta na Club Don Bosco na Noord, Centro Deportivo Betico Croes na Santa Cruz, y Teresita Center na San Nicolas, na final a ripara cu hopi ciudadano pa dificultad di mobilidad, no por a yega na e centronan pa vacuna.
E ora Bureau Rampen Bestrijding (BRA Aruba) a pidi permiso di Gobierno pa nan a usa e ex-“Bus di Salud” pa remodela esaki, pa di e forma ey nan por bay den barionan pa hiba vacuna mas cerca di porta di cas di esnan cu no por a yega pa un motibo of otro.
Despues di a haci un ‘dry-un’ recien na Centro Deportivo Betico Croes, porfin awor riba Diamars 11 di Januari 2022 el a bin pa cuminza duna servicio na pueblo di San Nicolas, pa un periodo.
Ora cu logra e meta na San Nicolas, segun Hermans a splica, pues ora e demanda cay, e ora nan lo bay hiba e Mobile Unit aki pa otro bario pa asina e ta na porta di tur hende.
Nan lo trece campaña pa informa pueblo unda e Mobile Unit aki lo bay staciona despues.
“Hunto como team nos ta bay salba Aruba,” Hermans a finaliza bisando.
