ORANJESTAD (AAN): Ombudsman, señora mr. Jurima Bryson, ta cuminsa un investigacion formal
riba gran escala encuanto molestia di holor persistente y problema cu calidad di aire den, entre otro, Parkietenbos, Mahuma, Buena Vista, Simeon Antonio, Bucutiweg, Wayaca y e areanan den cercania.
Motibo pa e investigacion formal ta un keho di un organisacion cu ta defende interes di e habitantenan. Ademas di e keho Ombudsman tabata na altura di e kehonan den e area aki caba. Considerando e naturalesa, alcance y duracion di e problematica, Ombudsman a dicidi pa investiga e asunto mas ampliamente.
E investigacion ta enfoca riba e situacion den e areanan envolvi y riba e manera cu gobierno a trata cu e situacion. Entre otro, lo wordo analisa e informacion disponibel tocante e calidad di aire, e posibel consecuencianan pa salud y ambiente di biba, y e manera cu notificacionnan y kehonan di habitantenan a wordo trata.
Varios instancianan ta envolvi
Pa e investigacion, varios instancianan di gobierno a wordo contacta formalmente. Entre otro ta trata di:
Ministerio di Asuntonan General, Cultura, Medio Ambiente y Naturalesa;
Ministerio di Infrastructura, Energia y Telecomunicacion;
Ministerio di Salubridad, Asunto Social, Cuido di Adulto Mayor y Maneho di Adiccion;
Aruba Wastewater Sustainable Solution N.V. (AWSS);
Crisis Management Office (CMO);
Departamento di Naturalesa y Medio Ambiente (DNM); y
Departamento di Salubridad Publico (DVG).
Ademas, Departamento di Legislacion y Asunto Huridico (DWJZ) ta wordo consulta como experto. Dependiendo di e resultadonan y informacion cu ta bira disponibel durante e investigacion, otro instancianan y expertonan tambe por wordo envolvi.
Experiencianan di habitantenan
E experiencianan di habitantenan y otro personanan envolvi ta importante pa e investigacion. P'esey Ombudsman a habri un OMBOX special via www.ombudsman.aw.
Habitantenan, empresarionan, organisacionnan social y otro personanan interesa por comparti nan experiencia y entrega documentonan of otro informacion relevante pa e investigacion via OMBOX.
Ombudsman ta haci un yamada na tur hende cu ta enfrenta e problematica aki pa comparti informacion. Esaki por yuda pa obtene un imagen mas completo di e situacion.
Pa ayudo pa yena e OMBOX, preguntanan tocante e investigacion of pa comparti comentario, por tuma contacto cu Bureau di Ombudsman via 281 6800 of Cette adresse e-mail est protégée contre les robots spammeurs. Vous devez activer le JavaScript pour la visualiser..
Investigacion independiente
Ombudsman ta conduci e investigacion aki di manera independiente y cu debido cautela. Informacion di habitantenan, instancianan envolvi y expertonan ta wordo tuma en cuenta den e evaluacion di e situacion. Principionan di scucha y wordo scucha tambe ta forma parti di e investigacion.
Despues di finalisa e investigacion, e resultadonan y conclusionnan lo wordo registra den un rapport di investigacion publico. Si tin motibo pa esey, e rapport tambe lo contene recomendacionnan pa e instancianan envolvi.
Ombudsman lo mantene publico informa riba desaroyonan relevante relaciona cu e investigacion aki.
