DIMP lo keda enfatiza na e contribuyente:
ORANJESTAD (AAN)-- Meverly Romano, Relacionista Publico di Departamento di Impuesto (DIMP), den entrevista cu Matutino DIARIO a remarca riba un punto cu DIMP ta enfatiza y lo keda enfatiza. E ta splica:
“Esaki ta cu nunca, nunca, duna un otro persona datonan pa log in. No duna nan bo user name ni password, pasobra e otro persona mes ta log in via su portal cu su mesun datonan.
Un hende no tin mester di duna un otro persona su datonan e log in den su portal. E no ta bay asina. Via su portal e ta autoriza un persona pa wak su asuntonan y e ta indica tambe kico precis e mag di wak y di haci, anto e persona ta log in cu su mesun password, cu su mesun user name, anto e ora ey e ta wak e datonan di e persona cu ta autorize. Esaki ta hopi importante, pasobra e BOi account no ta cualkier cuenta, no ta un shopping account, e ta un cuenta hopi importante cu ta contene datonan hopi sensitivo. Y ta p’esey tambe nos tin e ‘Multi Factor Authentication’ pasobra di un persona, pa casualidad a haya bo user name, bo password, ainda e no por log in, pasobra e mester yena e codigo multi factor pa e por drenta den e portal. Y esaki ta un di dos nivel di seguridad cu Departamento di Impuesto a percura pa nos tin. Pakico? Pasobra datonan di impuesto ta datonan sensitivo y datonan cu ningun persona cu no ta autoriza no mag di haya acceso na dje. Pesey tambe si un contribuyente kier duna otro persona autorizacion, hasta kizas su accounting pa atende su asuntonan di impuesto, e ta dune autorizacion pero tambe na un forma masha facil e por kita su autorizacion mesora. Kiermen, e contribuyente cu ta doño di su portal, ta den total control di su asuntonan di impuesto”, señora Meverly Romano, PR di DIMP a conclui.
